Yeni nəsil rəqəmsal imza olan “SİMA İmza”, “e-Səhiyyə” veb-portalı və mobil tətbiqinə tam inteqrasiya olunub. Bu addım vətəndaşların bir sıra tibbi xidmətlərə məsafədən, sürətli və təhlükəsiz şəkildə çıxışını təmin edib.

Azmedinfo.az xəbər verir ki, inteqrasiya nəticəsində istifadəçilər “SİMA İmza” vasitəsilə portala və ya mobil tətbiqə daxil olaraq xəstəlik vərəqələri, tibbi arayışlar, epikrizlər, reseptlər, peyvənd məlumatları, laborator analizlər və müayinə nəticələri kimi xidmətlərdən onlayn qaydada yararlana bilirlər.

Eyni zamanda, orqan donorluğu üçün müraciətlərin məsafədən göndərilməsi də mümkün olub. Bu müraciətlər Səhiyyə Nazirliyinin Orqan Donorluğu və Transplantasiyası üzrə Koordinasiya Mərkəzinin (odtkm.gov.az) rəsmi saytı vasitəsilə “SİMA İmza” ilə rəqəmsal şəkildə formalaşdırıla bilər.

Qeyd edək ki, bu xidmətlərdən istifadə etmək üçün vətəndaşlar öncə “digital.login” sisteminə “SİMA İmza” ilə daxil olmalıdırlar.

“SİMA İmza” haqqında

“SİMA İmza” — AzInTelecom MMC tərəfindən yaradılmış yeni nəsil rəqəmsal imzadır. Mobil tətbiq formasında təqdim edilən bu xidmət 4,2 milyondan çox dəfə yüklənib. Onun köməyi ilə vətəndaşlar xidmət mərkəzlərinə getmədən, istənilən yerdən sənədləri imzalaya və elektron xidmətlərdən yararlana bilirlər.

“SİMA İmza” tətbiqindən istifadə tam ödənişsizdir. Əlavə məlumat üçün sima.az saytına daxil olmaq və ya “157” Zəng mərkəzi ilə əlaqə saxlamaq mümkündür.