Danimarkanın Orhus Universitetinin tədqiqatçıları müəyyən ediblər ki, mədə xorasına səbəb olan Helicobacter pylori bakteriyasının istehsal etdiyi CagAN adlı zülal frag­menti demensiyanın inkişafına qarşı mübarizədə mühüm rol oynaya bilər.

Azmedinfo.az "Science Advances" (SciAdv) jurnalında dərc olunan yeni araşdırmaya diqqət çəkib:

Alimlər qeyd edirlər ki, Alzheimer xəstəliyinin əsas səbəbi beyində zərərli zülal yığıntılarının – beta-amiloid və tau zülallarının – toplanmasıdır. Bu zülallar neyronlar arasında lövhələr və düyünlər yaradaraq onların fəaliyyətini pozur. Hal-hazırda mövcud olan dərmanlar yalnız xəstəliyin erkən mərhələsində beta-amiloid yığıntılarına qarşı təsirli olur və tau zülalına qarşı effektiv deyildir. Həmçinin bu preparatların ciddi, bəzən beyin ödemi kimi ağır fəsadları var.

Orhus Universitetinin alimləri isə fərqli yanaşma təklif ediblər: artıq formalaşmış zərərli strukturları məhv etmək əvəzinə, onların yaranmasının qarşısını almaq. Onlar sübut ediblər ki, H. pylori tərəfindən ifraz olunan CagAN zülalı həm beta-amiloid, həm də tau zülalının yığılmasını əngəlləyə bilir. Maraqlıdır ki, bu təsir minimal miqdarda CagAN ilə belə müşahidə olunub.

Nüvə maqnit rezonansı (NMR) vasitəsilə aparılan analizlər göstərib ki, CagAN zülalı toksik strukturların yaranmasının erkən mərhələlərinə müdaxilə edir və zülal molekullarının birləşməsinin qarşısını alır.

Bundan əlavə, bu zülalın 2-ci tip şəkərli diabetlə əlaqəli IAPP və Parkinson xəstəliyi ilə əlaqəli alfa-sinuklein zülallarının da yığılmasını dayandırmaq qabiliyyətinə malik olduğu müəyyən edilib. Alimlər bu kəşfin gələcəkdə müxtəlif neyrodegenerativ xəstəliklərə qarşı universal dərmanların yaradılmasına imkan verəcəyinə inanırlar.