Türkiyə Səhiyyə Nazirliyinin yaydığı məlumata görə, 2024-cü ildə hər 100 min canlı doğuma düşən ana ölümü göstəricisi 11,5-ə enərək ölkə tarixində qeydə alınan ən aşağı səviyyəyə çatıb.

Azmedinfo.az "TRT Haber"ə iatinadən yazır ki, bu nəticə ilə Türkiyə, 2025-ci il üçün müəyyən edilmiş hədəfi qabaqlayaraq mühüm bir uğura imza atıb.

Ana və uşaq ölümlərində davamlı azalma

Nazirliyin açıqlamasında "Türkiyə Milli Ana Ölümü Araşdırması"nın nəticələrinə əsaslanaraq bildirilib ki, 2005-ci ildə hər 100 min canlı doğuma görə 28,5 faiz olan ana ölümü göstəricisi 2017-ci ildə 14,5, 2023-cü ildə 13,5 faiz olaraq qeydə alınıb. 2024-cü ildə isə bu göstərici 11,5 faizə enərək indiyədək ölçülən ən aşağı səviyyəyə çatıb.

BMT-nin hədəfinə illər öncə çatılıb

Açıqlamada ana ölüm göstəricisinin – bir il ərzində hamiləliklə bağlı və ya hamiləliyin ağırlaşdırdığı səbəblərdən həyatını itirən qadınların sayının həmin il ərzində baş verən canlı doğumların sayına nisbəti olaraq hesablandığı qeyd olunub. Bu göstərici 100 minlə vurularaq təqdim edilir.

Bu rəqəmin ölkələrin səhiyyə və inkişaf səviyyəsini əks etdirən əsas indikatorlardan biri olduğu vurğulanıb. Səhiyyə qurumlarının bu nisbəti aşağı salmaq üçün müxtəlif fəaliyyət planları həyata keçirdiyi bildirilib.

Nazirliyin açıqlamasında qeyd edilib ki, Türkiyə ana ölümü göstəricilərinin azaldılması baxımından ən uğurlu ölkələrdən biridir. 1990-cı ildə hər 100 min canlı doğuma görə 100 olan ana ölümü göstəricisi, 2000-ci illərdə atılan addımlar nəticəsində kəskin şəkildə azaldılıb və BMT-nin "2030-cu ilə qədər ana ölümü nisbətinin 100 min doğuma görə 70-in altına endirilməsi" hədəfinə artıq 2000-ci illərin ortalarında çatılıb.

Rəqəmlərlə körpə ölümlərində azalma

Türkiyə Statistika Təşkilatının (TÜİK) məlumatına görə, 2023-cü ildə ölkədə 9731 körpə ölümü qeydə alınıb. Bu rəqəm 2024-cü ildə 8475-ə enib. Körpə ölüm göstəricisi 2023-cü ildə hər min doğuma görə 10,1 olduğu halda, 2024-cü ildə 9,0 olaraq ölçülüb. Beş yaş altı ölüm göstəricisi isə 2023-cü ildə 14,7 ikən, 2024-cü ildə 11,1-ə düşüb.