Beynəlxalq astronomlar qrupu Yerə bənzər xüsusiyyətlərə malik GJ 12 b adlı ekzoplaneti aşkarlayıb. Bu planet ölçüsü, istiliyi və sıxlığı baxımından Yerə çox oxşayır. 40 işıq ili uzaqlıqda yerləşən bu planet Günəş sistemindən kənarda həyat axtarışları üçün ümidverici başlanğıc nöqtəsi sayılır.

Azmedinfo.az "arXiv" portalında dərc olunan araşdırmanın nəticələrinə istinadən yazır ki, yeni tapılmış planet M sinifinə aid, aktiv olmayan qırmızı cırtdan ulduzun ətrafında fırlanır. Bu isə müşahidə üçün çox əlverişli şərait yaradır, çünki ulduzun sakitliyi tədqiqatları çətinləşdirmir.

NASA-nın TESS peyki və MAROON-X adlı spektroqraf vasitəsilə əldə olunan ilkin məlumatlara görə, GJ 12 b-nin radiusu Yerinkindən cəmi 4% kiçikdir, səth temperaturu isə təxminən 27°C-dir. Bu temperatur maye suyun mövcudluğu üçün əlverişli hesab olunur. Planetin kütləsi də Yerinkindən azdır — təxminən 71%. Alimlər düşünürlər ki, bu planetin aşağı sıxlığı onun su və atmosferə malik olması, ya da tərkibində dəmirin az olması ilə əlaqəli ola bilər.

İndi tədqiqatçılar diqqətlərini “Ceyms Uebb” kosmik teleskopuna yönəldiblər. Bu teleskop planetin atmosferini analiz etmək üçün lazım olan bütün avadanlıqlara malikdir. Bununla belə, bir problem var: GJ 12 b-nin kiçik kütləsi onun atmosferini itirməsinə səbəb ola bilər. Amma alimlər hesab edirlər ki, əgər planetdə vulkanik fəallıq varsa, bu atmosferin qorunmasına kömək edə bilər.

Bu kəşf, kainatda ən çox rast gəlinən ulduz növü olan qırmızı cırtdanların ətrafında planetlərin necə yarandığını anlamaq üçün elm adamlarına yeni fürsətlər yaradır.