Ekologiya və Təbii Sərvətlər Nazirliyi ictimaiyyəti şirin su ekosistemlərinin qorunmasına və sudan səmərəli istifadəyə çağırır. Nazirliyin yaydığı açıqlamada vurğulanır ki, şirin su ekosistemləri – çaylar, göllər, bataqlıqlar və yeraltı su ehtiyatları – davamlı inkişafın təməlidir.

Azmedinfo.az xəbər verir ki, bu ekosistemlər yalnız içməli su ilə təmin etmir, eyni zamanda kənd təsərrüfatı, sənaye, enerji istehsalı, qida təhlükəsizliyi və sanitariya sahələrinin davamlılığını da təmin edir. Onlar həmçinin planetimizin bioloji müxtəlifliyinin qorunmasında mühüm rol oynayır – minlərlə canlı növünün taleyi bu mühitlərə bağlıdır və bizim suya necə yanaşmağımız bu ekosistemlərin gələcəyini müəyyən edir.

Nazirlik bildirir ki, təmiz, kifayət qədər və əlçatan şirin suya çıxış hər bir insanın fundamental hüququdur. Su insan həyatı, sağlamlığı və rifahı üçün əvəzolunmazdır. Lakin hazırda dünyada su ehtiyatlarının azalması, çayların quruması, göllərin səviyyəsinin düşməsi və suyun keyfiyyətinin pisləşməsi bu ekosistemlərə və onlardan asılı olan insanlara ciddi təsir göstərir.

Bu səbəbdən Ekologiya və Təbii Sərvətlər Nazirliyi suyun istifadəsində səmərəliliyin artırılmasını, israfın qarşısının alınmasını və şirin su resurslarının qorunması üçün hər kəsi məsuliyyətli davranmağa səsləyir.