Səhiyyə Nazirliyinin Elmi-Tədqiqat Ağciyər Xəstəlikləri İnstitutunda tibbi elmin mühüm sahələrindən biri olan vərəmin laborator diaqnostikasına dair müasir yanaşmaların təqdim olunduğu təlim keçirilib.

Azmedinfo.az xəbər verir ki, “Vərəmin laborator diaqnostikasında yeniliklər” mövzusunda keçirilən bu tədbir elmi düşüncənin praktika ilə qovuşduğu məkan olub.

Tədbirdə çıxış edən Almaniyanın Qautinq şəhərində yerləşən Supra Milli Laboratoriyasının aparıcı ekspertləri — Dr. Evgeniy Saqalçik və V. Antonenko — Qlobal Fondun maliyyə dəstəyi və texniki əməkdaşlığı çərçivəsində ölkəmizdə aparılan sistemli işlər barədə iştirakçılara ətraflı məlumat veriblər. Bildirilib ki, Azərbaycanda vərəm diaqnostikası üzrə laborator şəbəkənin qurulması, onun təkmilləşdirilməsi, iş keyfiyyətinin yüksəldilməsi, metodik göstərişlərin hazırlanması və analizlərin planlaşdırılması istiqamətində məqsədyönlü fəaliyyətlər davam etdirilir.

Təlimə xarici mütəxəssislərlə yanaşı, ölkənin müxtəlif bölgələrindən vərəmin diaqnostikası və müalicəsi ilə məşğul olan təcrübəli həkimlər də qatılıb. Beləliklə, tibbin bu çətin sahəsində beynəlxalq təcrübə və yerli mütəxəssislərin bilikləri bir masada qovuşaraq gələcək uğurlu mübarizənin bünövrəsini möhkəmləndirib.