Səhiyyə Nazirliyinin K.Y.Fərəcova adına Elmi-Tədqiqat Pediatriya İnstitutunda ekspert sinifli, notebook formatında universal ultrasəs müayinə cihazı quraşdırılıb. Bu yenilik sayəsində uşaqların sağlamlığının qorunması və xəstəliklərin erkən diaqnostikası daha yüksək səviyyəyə çatdırılacaq.

Azmedinfo.az xəbər verir ki, yeni cihaz kardioloji müayinələr, neyrosonoqrafiya, muskuloskeletal analiz, periferik damar sisteminin yoxlanışı və abdominal orqanların müayinəsi sahələrində tam funksional imkanlar təqdim edir. Eyni zamanda, təcili yardım hallarında sürətli diaqnostika üçün ideal vasitədir.

Cihaz 4D transözofageal ekokardioqrafiya (TEE), intracardiac ekokardioqrafiya (ICE), neonatal və pediatrik müayinələr üçün geniş imkanlarla təchiz olunub. Bu xüsusiyyətlər onu həm yenidoğulmuşlar, həm də böyük yaşlı uşaqlar üçün əvəzsiz edir.

Son iki ildə İnstitutda müasir tibbi avadanlıqlarla təchizat genişlənib, maddi və texniki baza daha da gücləndirilib. Bu da dəqiq diaqnostika və vaxtında tibbi müdaxiləni mümkün edir.

Uşaqların sağlamlığı həmişə prioritet olaraq qalır və bu istiqamətdə görülən işlər davam etdiriləcək.