İcbari Tibbi Sığorta üzrə Dövlət Agentliyinin məlumatına görə, çarpazvari bağların rekonstruksiyası (bərpası) əməliyyatları artıq icbari tibbi sığorta çərçivəsində qarşılanır.

Azmedinfo.az xəbər verir ki, bu yenilik vətəndaşların travma və idman zədələri nəticəsində tez-tez rast gəlinən diz oynağı zədələrinin müalicəsinə daha əlçatan şəkildə çıxışını təmin edir.

Belə ki, ön və arxa çarpaz bağların qopması, dizin sabitliyini və funksionallığını ciddi şəkildə poza bilər və əməliyyatla bərpa edilmədiyi təqdirdə, gələcəkdə ciddi ortopedik fəsadlara səbəb ola bilər. Əvvəllər bu cür əməliyyatlar vətəndaşların şəxsi vəsaiti hesabına aparılırdı. İndi isə bu müdaxilələr İcbari Tibbi Sığorta sisteminə daxil olan tibb müəssisələrində icra olunur.

Əməliyyat üçün ilkin müayinə, MRT müayinəsi və ortoped-travmatoloqun qərarı əsas götürülür. Vətəndaşlar yaşadıqları ərazi üzrə poliklinikaya müraciət etməklə göndəriş ala və qeydiyyatda olduqları tibbi xidmət göstərən müəssisədə bu əməliyyatı etdirə bilərlər.

Qeyd edək ki, bu xidmətin icbari tibbi sığortaya daxil edilməsi, xüsusilə idmanla məşğul olan gənclər, aktiv həyat tərzi sürən şəxslər və travma keçirmiş pasiyentlər üçün əhəmiyyətli maliyyə dəstəyi və reabilitasiya imkanı yaradır.