JCEM: Ketodieta cəmi üç həftəyə yaddaş üçün vacib olan BDNF zülalını yüksəldir

Cəmi üç həftəlik ketodieta beynin fəaliyyətində nəzərəçarpacaq dəyişikliklərə səbəb ola bilər.

Azmedinfo.az Niderland alimlərinin The Journal of Clinical Endocrinology & Metabolism (JCEM) jurnalında dərc olunan yeni araşdırmasına istinadən yazır ki, bu müddət ərzində beyində qan dövranı güclənir və yaddaşla bağlı mühüm zülal olan BDNF-in səviyyəsi artır.

Araşdırmada artıq çəkisi olan 11 sağlam iştirakçı yer alıb. Onlar altı həftə ərzində növbə ilə adi və ketogen pəhrizə riayət ediblər. Hər bir mərhələdən sonra PET və MRT müayinələri vasitəsilə beyinə qan axını, eləcə də qanda beta-hidroksibutirat və BDNF səviyyələri ölçülüb.

Nəticələr göstərib ki, ketodieta fonunda beynin qanla təminatı orta hesabla 22 faiz, BDNF səviyyəsi isə 47 faiz artıb. Bundan əlavə, keton cisimciklərinin səviyyəsi nə qədər yüksək olurdusa, beyində qan dövranı bir o qədər yaxşı olurdu.

Alimlər hesab edirlər ki, ketodieta təkcə Altsheymer xəstəliyi və digər idrak pozuntularının müalicəsində deyil, həm də yaşla əlaqədar beyin fəaliyyətinin azalmasının qarşısının alınmasında faydalı ola bilər.