Lüdviq-Maksimilian Universitetinin tədqiqatçıları Yer planetində həyatın yaranması ilə bağlı mühüm kəşfə imza atıblar. Onlar araşdırmalar zamanı DNT və RNT-nin ilkin molekullarının ibtidai Yer şəraitində necə öz-özünü təkrarlaya bildiyini müəyyən ediblər.

Azmedinfo.az "Actualnews" portalına istinadən yazır ki, eksperimentlər vulkanik adalarda yerləşən qayalıqların məsamələrində yaranan xüsusi mühit — su və qazların qapalı məkanda qarşılıqlı təsiri — nuklein turşularının toplanmasına şərait yaratdığını göstərib. Laboratoriya şəraitində alimlər bu prosesi təkrar edərək, su axınının qazla təmas zonasına qalxaraq kondensasiya olunması ilə baş verən hadisələri müşahidə ediblər.

Bu proses nəticəsində DNT-nin konsentrasiyasında əhəmiyyətli artım qeydə alınıb: cəmi beş dəqiqə ərzində üç dəfə, bir saat ərzində isə otuz dəfə çoxalıb. Lakin molekulların uğurlu şəkildə çoxalması üçün onların ayrılması vacib idi — bu isə duz konsentrasiyasının axınların dinamikası nəticəsində dəyişməsi ilə baş verib.

Tədqiqat nəticələri sübut edir ki, milyardlarla il əvvəl Yer üzündə mövcud olmuş təbii şərait ilk nuklein turşularının yaranmasında və beləliklə, həyatın başlanğıcında həlledici rol oynamış ola bilər.