Ölkə ərazisində tibbi tullantıların idarə olunması sahəsində məlumatlılığın artırılması məqsədilə Ekologiya və Təbii Sərvətlər Nazirliyinin yerli qurumları tərəfindən həyata keçirilən ardıcıl maarifləndirici tədbirlər davam etdirilir. Bu çərçivədə növbəti görüşlər Sumqayıt şəhər 1 nömrəli xəstəxanada, eləcə də Ağsu və Kürdəmir rayon mərkəzi xəstəxanalarında keçirilib.

Azmedinfo.az xəbər verir ki, tədbirlər zamanı səhiyyə müəssisələrinin rəhbər şəxsləri, tibb heyəti və təsərrüfat sahəsində çalışan müvafiq əməkdaşlarla birgə tibbi tullantıların idarə olunmasında mövcud çətinliklər, normativ hüquqi tələblər və onların praktik tətbiqi imkanları ətrafında geniş müzakirələr aparılıb. İştirakçılara tibbi tullantıların düzgün çeşidlənməsi, təhlükəlilik səviyyəsinə görə ayrı-ayrı kateqoriyalara bölünməsi və zərərsizləşdirilməsi üçün beynəlxalq standartlara uyğun metodların tətbiqinin vacibliyi çatdırılıb.

Bildirilib ki, düzgün idarə olunmayan tibbi tullantılar yalnız ətraf mühitə deyil, həm də ictimai sağlamlığa ciddi təhdid yaradır. Bu baxımdan xəstəxanaların sanitar-gigiyenik təhlükəsizliyi və ekoloji məsuliyyəti arasında birbaşa əlaqə olduğu vurğulanıb. Görüş zamanı həmçinin tibbi tullantıların toplanması, daşınması və məhv edilməsi proseslərində istifadə edilən avadanlıqlar, dezinfeksiya vasitələri və müasir texnologiyalar barədə əyani məlumatlar da təqdim olunub.

Maarifləndirici sessiyalar qarşılıqlı fikir mübadiləsi, praktiki təkliflərin irəli sürülməsi və əməkdaşlıq imkanlarının genişləndirilməsi baxımından səmərəli olub.