İyunun son günlərindən etibarən bir sıra Avropa ölkələrində müşahidə olunan anomal isti hava şəraiti artıq ölüm halları ilə nəticələnib. Həkimlərin və yerli qurumların məlumatına əsasən, yalnız Macarıstanda son yeddi gün ərzində yüksək temperatur səbəbindən 18 nəfər vəfat edib. Həlak olanların əksəriyyəti yaşlı insanlar və xroniki xəstəliklərdən əziyyət çəkənlərdir.

Azmedinfo.az "Euronews"a istinadən yazır ki, Slovakiyada bəzi bölgələrdə temperatur 42°C-ni keçib. Çexiya və Serbiyanın müəyyən ərazilərində havanın hərarəti uzun müddətdir ki, 40°C-dən yuxarı qalır. Həkimlər sakinləri xüsusilə günorta saatlarında çölə çıxmamağa, bədənlərini və evlərini sərin tutmağa çağırırlar.

Yunanıstan və Portuqaliyada isə yüksək temperaturlara meşə yanğınları da əlavə olunub ki, bu da vəziyyəti daha da ağırlaşdırıb. Bir çox ölkədə qırmızı hava təhlükə siqnalı elan olunub. Havanın hərarətinin yüksəlməsi nəticəsində minlərlə insan istilikvurma və susuzlaşma şikayətləri ilə tibb müəssisələrinə müraciət edib.

Hazırda bəzi dövlətlər istilərin mənfi təsirlərini azaltmaq məqsədilə əlavə tədbirlər görmək imkanlarını müzakirə edirlər. Mütəxəssislər iqlim dəyişikliyi fonunda bu cür ekstremal hava hadisələrinin gələcəkdə daha da tez-tez baş verə biləcəyini vurğulayırlar.

Vətəndaşlara hava proqnozlarını yaxından izləmək, xüsusilə yaşlı və xəstə qohumlara diqqət yetirmək tövsiyə olunur.