Azərbaycan Tibb Universitetinin (ATU) Tədris Stomatoloji Klinikası ilə Əmək və Əhalinin Sosial Müdafiəsi Nazirliyinin tabeliyində fəaliyyət göstərən Sosial Xidmətlər Agentliyi arasında qurulan əməkdaşlıq çərçivəsində əhalinin sosial cəhətdən həssas qruplarını əhatə edən bir sıra səyyar tibbi aksiyalar həyata keçirilib.

Azmedinfo.az xəbər verir ki, aksiyaların əsas məqsədi stomatoloji xidmətlərin daha geniş əhali qrupları – xüsusilə valideyn himayəsindən məhrum uşaqlar, sağlamlıq imkanları məhdud şəxslər və ahıl insanlar üçün əlçatanlığını təmin etmək, eyni zamanda ağız və diş sağlamlığının qorunması ilə bağlı maarifləndirmə tədbirlərini gücləndirməkdir.

Aksiyalar zamanı ATU-nun peşəkar həkim-mütəxəssisləri tərəfindən profilaktik baxışlar aparılıb, ilkin müayinələr və zəruri stomatoloji müdaxilələr yerinə yetirilib. Bundan əlavə, iştirakçılara düzgün diş baxımı, gigiyena qaydaları və erkən diaqnostikanın əhəmiyyəti barədə ətraflı məlumat verilib.

Bu təşəbbüs cəmiyyətin ən həssas təbəqələrinin sağlamlıq ehtiyaclarının qarşılanmasına, onların həyat keyfiyyətinin yüksəldilməsinə və tibbi xidmətlərə bərabər çıxış imkanlarının yaradılmasına mühüm töhfə verir. Gələcəkdə bu aksiyaların daha geniş miqyasda davam etdirilməsi nəzərdə tutulur.