Ölümdən sonra orqan donorluğu – insanın fiziki varlığı sona çatsa da, yaşatmaq gücünün davam etməsi deməkdir. Bu, insanlığın ən ülvi ifadələrindən biridir. Belə bir böyük fədakarlığın sayəsində yenidən həyata qovuşanlardan biri də Kamal Qəmbərovdur.

Azmedinfo.az Orqan Donorluğu və Transplantasiyası üzrə Koordinasiya Mərkəzinin təqdim etdiyi həyat qurtaran hekayələri izləyiciləri ilə paylaşır:

Hər şey səhhətindəki kiçik narahatlıqlarla başladı. Əvvəlcə halsızlıq, yorğunluq və bədəndə şişkinlik müşahidə olundu. Simptomlar şiddətləndikcə Kamal həkimə müraciət etdi. Geniş laborator müayinələr, müalicə cəhdləri aparılsa da, vəziyyət sabitləşmədi. Kreatinin səviyyəsi normal həddə düşmürdü. Nəticədə Kamala hemodializ müalicəsi təyin olundu. Bu prosedur bir müddət kömək etsə də, aydın oldu ki, onun yaşaması üçün böyrək köçürülməsi vacibdir.

Kamal Səhiyyə Nazirliyinin Orqan Donorluğu və Transplantasiyası üzrə Koordinasiya Mərkəzinə müraciət etdi və gözləmə siyahısına daxil edildi. Ümidin heç vaxt itmədiyi bir anda telefon zəngi gəldi — meyit donorun böyrəklərindən biri Kamala uyğun gəlmişdi.

Kamal Gömrük Hospitalında peşəkar həkim briqadasının nəzarətinə götürüldü. Cərrah Mircəlal həkimin rəhbərliyi ilə həyata keçirilən böyrək transplantasiyası uğurla başa çatdı. Bu, bir nəfərin həyatdan köçdükdən sonra bir başqasına həyat bağışlamasının gerçək hekayəsidir.

Hazırda Kamalın səhhəti stabildir. O, yeni həyatını qorumağa sadiqdir: “Əməliyyatdan sonra siqaretdən və digər zərərli vərdişlərdən imtina etmişəm. Yağlı və duzlu yeməklərdən uzaq dururam. Sağlam həyat tərzi sürürəm.”

Bu yaşantı Kamal üçün yalnız fiziki sağalma deyil, eyni zamanda mənəvi oyanışa çevrilib.

“Donorun ruhuna hər gün rəhmət oxuyuram. O, təkcə mənim deyil, bir neçə insanın həyatını xilas edib. Elə mən də vəsiyyət etmişəm ki, əgər bir gün dünyamı dəyişsəm, orqanlarım başqasına həyat olsun. Çünki bu, həyatın ən mənalı payıdır.”