Bel və omba, həmçinin bel və boy nisbəti insanın fiziki vəziyyəti haqqında mühüm məlumat verir. Bu göstəricilərin qeyri-normal olması ürək xəstəlikləri və hərəkət məhdudiyyəti riskini artırır.

Azmedinfo.az “Aging” jurnalında dərc olunan tədiqata diqqət çəkib.

İtaliyanın A. Gemelli Universitet Klinikasının tədqiqatçıları bu nisbətlərin fiziki qabiliyyəti proqnozlaşdırmaq üçün nə dərəcədə faydalı ola biləcəyini araşdırıblar. 

Araşdırmaya 18-98 yaş arası 10 690 italyan vətəndaşı cəlb olunub. İştirakçılardan bel və omba, bel və boy nisbəti ölçülüb və hərəkətliliyi qiymətləndirmək üçün beş dəfə ardıcıl stuldan qalxma testi aparılıb.

Nəticələr göstərib ki, bel-omba və bel-boy nisbəti yüksək olan şəxslər testi daha gec tamamlayıblar. Bu isə onların fiziki fəaliyyətinin zəiflədiyinə işarədir. Əldə olunan nəticələr həyat tərzi faktorları – qidalanma, idman və ürək sağlamlığı – nəzərə alındıqdan sonra da qüvvədə qalıb.

Xüsusilə bel-boy nisbəti bütün yaş və cins qruplarında hərəkətliliyin sabit göstəricisi kimi seçilib. Normadan kənar göstəricilər daha çox kişilərdə qeydə alınıb.

Beləliklə, qarın piyinin təkcə xroniki xəstəliklərin deyil, həm də azalmış hərəkət qabiliyyətinin göstəricisi olduğu aydınlaşıb. Fiziki aktivliyi qorumaq və yaşla əlaqəli hərəkət itkisini önləmək üçün balanslı qidalanma və müntəzəm, xüsusilə güc və elastiklik məşqləri tövsiyə olunur.