Yeni bir Norveç araşdırmasına görə, hər gün orta hesabla 78 dəqiqədən çox gəzən şəxslərdə xroniki bel ağrısına tutulma riski əhəmiyyətli dərəcədə azalır. Üstəlik, bu gəzintilərin sürətli tempdə olması da vacib deyil; yavaş və sakit addımlarla gəzmək də kifayətdir.

Azmedinfo.az "Planet today" nəşrinə istinadən yazır ki, bel ağrısı dünyada əlilliyin əsas səbəblərindən biri hesab olunur. Ancaq bu problemin həlli bahalı ergonomik oturacaqlar deyil, sadə bir hərəkət ola bilər: gəzmək.

Gündə 100 dəqiqə gəzənlərdə risk 23 faiz azalır

Norveç Elm və Texnologiya Universitetinin tədqiqatçıları 11 mindən çox yetkinin sağlamlıq göstəricilərini analiz ediblər. İştirakçılar bir həftə boyunca bud və bel nahiyələrinə taxılmış akselerometrlərlə gündə nə qədər və hansı tempdə gəzdiklərini qeydə alıblar.

Gündə 78-100 dəqiqə gəzən şəxslərdə, gündə 78 dəqiqədən az gəzənlərlə müqayisədə xroniki bel ağrısı riski 13 faiz daha aşağı olub. Gündə 100 dəqiqədən çox gəzənlərdə isə bu göstərici 23 faizə qədər çatır.

Yerişin tempinin də müəyyən faydaları müşahidə olunsa da, tədqiqat qrupu xüsusilə ümumi gəzmə müddətinin, gəzişin sürətindən daha həlledici olduğunu vurğulayır.

“Tədqiqatımız göstərdi ki, gündəlik gəzmə müddəti bel ağrısı riskini azaltmaqda yerimə sürətindən daha önəmlidir,” – deyə araşdırmanın aparıcı müəllifi, sağlamlıq üzrə mütəxəssis Rayane Haddadj bildirir.

Hərəkətsiz çağın sadə həlli gəzməkdir

Müasir həyatın oturaq yaşam tərzi bel ağrısı da daxil olmaqla bir çox sağlamlıq problemini artırır. Halbuki gəzmək təkcə bel ağrısının qarşısını almaqla qalmır, eyni zamanda beyin sağlamlığını dəstəkləyir, ürək xəstəlikləri riskini azaldır, yaradıcılığı artırır və ömür müddətini uzadır.

Tədqiqatçılar bildirirlər ki, bu nəticələr sağlamlıq siyasətlərində gəzməyin təşviq olunmasının vacibliyinə işarə edir.Çünki gəzmək həm asan tətbiq edilə bilən, həm də aşağı maliyyətli bir profilaktik sağlamlıq strategiyası ola bilər.