Səhiyyə Nazirliyinin rəsmi “Instagram” səhifəsində və “Sağlam radio”da “Heyvan dişləmələri və quduzluq xəstəliyi” mövzusunda maarifləndirici yayım təşkil edilib. Yayımda iştirak edən Genişləndirilmiş İmmunlaşdırma Proqramının (GEM) nümayəndəsi heyvanlar tərəfindən törədilə bilən xəsarətlərin yaratdığı sağlamlıq riskləri, xüsusilə də ölümcül təhlükə yaradan quduzluq xəstəliyi barədə ətraflı məlumat verib.

Azmedinfo.az xəbər verir ki, mütəxəssis quduzluq virusunun insanlara əsasən ev heyvanlarının (it, pişik) və vəhşi heyvanların dişləməsi, çırmaqlaması və ya tüpürcəkləməsi yolu ilə keçdiyini vurğulayıb. Bu cür hallarda ilk tibbi yardımın vaxtında və düzgün göstərilməsinin həyati əhəmiyyət daşıdığı bildirilib.

Eyni zamanda, profilaktik tədbirlər, peyvənd müalicəsinin ardıcıllığı və təyin edilən müalicə kursunun izlənməsi ilə bağlı vacib tövsiyələr dinləyicilərin diqqətinə çatdırılıb. Yayımın əsas məqsədi ictimaiyyətin quduzluğa dair məlumatlılıq səviyyəsini artırmaq və bu təhlükəli infeksiyanın qarşısını almaqda əhalini daha məsuliyyətli davranmağa təşviq etmək olub.