Cons Hopkins Tibb Mərkəzindən bir qrup tədqiqatçı şizofreniya, bipolyar pozuntu və ağır depressiya kimi psixi pozuntularla virus infeksiyaları arasında mümkün əlaqə aşkar edib.

Azmedinfo.az "Translational Psychiatry" jurnalında dərc olunan inqilabi araşdırmada alimlər hepatit C virusunu (HCV) beynin damar kələflərində (serebral damar çələngində) aşkar ediblər. Tədqiqat çərçivəsində elm adamları həm psixi pozuntuları olan, həm də olmayan insanların ölüm sonrası beyin toxumalarını və 285 milyon nəfərə dair elektron tibbi məlumatları təhlil ediblər.

Damar kələfi – beynin mədəciklərində yerləşən qan damarları və ixtisaslaşmış hüceyrələrdən ibarət bir şəbəkədir. Bu struktur beyin və onurğa beynini qoruyan beyin-omurilik mayesinin (BOM) istehsalına cavabdehdir. Eyni zamanda, qan və beyin arasında keçiciliyi tənzimləyən qan-beyin baryerinin formalaşmasında mühüm rol oynayır. Qaraciyəri zədələyən hepatit C virusunun bu hissədə aşkarlanması onun beynin kimyasını və immun siqnalizasiyasını dəyişərək psixi simptomlara səbəb ola və ya onları ağırlaşdıra biləcəyini ehtimal etməyə əsas verir.

Tədqiqatçılar şizofreniya və ya bipolyar pozuntu diaqnozu qoyulmuş şəxslərin beyin toxumalarında virusların daha çox olduğunu müəyyən ediblər. Bununla belə, digər viruslardan fərqli olaraq, hepatit C virusu yalnız bu şəxslərin beyin qişalarında aşkarlanıb. Həmçinin, hepatit C virusuna yoluxmuş bütün insanlarda virusun beyin qişasında aşkarlanmadığı məlum olub ki, bu da infeksiyanın həmişə damar kələfinə yayılmadığını göstərir.

Bu kəşf psixi xəstəliklərdən əziyyət çəkən insanların diaqnostika və müalicəsində yeni imkanlar aça bilər.

Araşdırmanın rəhbəri, Cons Hopkins Universitetinin Tibb Fakültəsindən Sarven Sabunçyan bildirib: “Bipolyar pozuntu və ya şizofreniya simptomları olan bəzi insanlarda əslində hepatit C infeksiyası ola bilər. Ola bilsin ki, virusun müalicəsi bu şəxslərdə psixi simptomları yüngülləşdirə bilər.”