Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyeva “Məlhəm Hospital”a səfər edib.

Azmedinfo.az xəbər verir ki, ziyarət çərçivəsində Leyla Əliyeva ilk olaraq müasir tələblərə cavab verən, tam avtomatlaşdırılmış laboratoriya ilə tanış olub. Daha sonra o, Təcili Yardım Şöbəsinin fəaliyyəti barədə ətraflı məlumat alaraq burada çalışan həkimlərlə görüşüb, xidmətin operativliyi və keyfiyyəti ilə maraqlanıb.

Hospitalda yaradılmış şəraitlə tanışlıq zamanı Leyla Əliyeva radiologiya bölməsini də ziyarət edib. Ona təqdim olunan müasir tomosintezli mammoqrafiya cihazı barədə məlumat verilib. Qeyd olunub ki, beynəlxalq statistikaya əsasən, 2031-ci ilədək hər səkkiz qadından biri süd vəzi xərçəngi riski ilə üzləşə bilər. Bu səbəbdən xəstəxanada qabaqcıl texnologiyaların tətbiqi ilə xəstəliklərin erkən aşkarlanması istiqamətində ciddi addımlar atılır.

Leyla Əliyeva həmçinin uşaq sağlamlığı sahəsində görülən işlərlə də tanış olub. Ultrasonoqrafiya otağında Daun sindromlu və spektr pozuntulu uşaqların müayinəsi prosesi barədə ona məlumat təqdim olunub. Bildirilib ki, son illərdə ölkədə yüksək texnologiyalı tibbi avadanlıqların istifadəsi və ixtisaslı kadrların fəaliyyəti nəticəsində erkən diaqnostika imkanları artıb, bu isə ağır doğuş risklərinin azalmasına töhfə verib.