Marmara Universiteti Pendik Tədris və Araşdırma Xəstəxanasında istifadəyə verilən yeni nəsil süni intellekt dəstəkli radioterapiya cihazı xərçəng müalicəsində yeni imkanlar açır.

Azmedinfo.az "TRT Haber"ə istinadən yazır ki, bu texnologiya hər pasiyent üçün fərdi müalicə planı hazırlanmasına şərait yaradır, sağlam toxumaların qorunmasını təmin edir və müalicənin effektivliyini artırır.

Radioterapiya xərçəngin müalicəsində əsas üsullardan biridir. Süni intellektin tətbiqi bu sahədə müalicə prosesini daha dəqiq, sürətli və şəxsə uyğun hala gətirir. Radyasiya Onkologiyası üzrə mütəxəssis Prof. Dr. Zerrin Özgen bildirir ki, bu sistemin ən böyük üstünlüyü xəstəni yüksək dəqiqliklə müalicə etməsi və sağlam orqanların daha yaxşı qorunmasıdır.

Yeni texnologiya həmçinin həkimlərə daha sürətli və doğru müalicə planları hazırlamaq, keyfiyyət nəzarətini asanlıqla aparmaq imkanı verir. Bu da həm fiziki, həm də psixoloji baxımdan xəstələrin yükünü azaldır, müalicə prosesini daha rahat və ümidverici edir.