B12 vitamini çatışmazlığı sinir hüceyrələrinə qalıcı zərər verə bilər. Dr. Abdullah Özkardeş bildirib ki, B12 səviyyəsinin aşağı və ya sərhəddə olması geri dönməsi çətin olan sinir sistemi zədələrinə səbəb ola bilər.

Azmedinfo.az "Habertürk"ə istinadən yazır ki, California Universiteti, San Fransiskoda aparılan araşdırmaya əsasən, qan analizlərində aşağı və ya sərhəddə olan B12 səviyyələri yaşlı insanlarda idrak zəifləməsinə və beyin toxumasında zədələnməyə yol aça bilər.

Özkardeş qeyd edib ki, B12 vitamini yalnız qanazlığı ilə deyil, eyni zamanda sinir sistemi sağlamlığı ilə də sıx bağlıdır. Xüsusilə yaşlı insanlarda unutqanlıq, diqqət pozuntusu və reflekslərin zəifləməsi kimi əlamətlər müşahidə olunursa, B12 səviyyəsi diqqətlə qiymətləndirilməli və erkən dövrdə əlavə vitamin verilməlidir.

O, əlavə edib ki, yaşlı və nevroloji şikayətləri olan pasiyentlərdə yalnız qan analizləri deyil, klinik simptomlar və funksional göstəricilər də nəzərə alınmalıdır. B12 səviyyəsi aşağı olan şəxslərdə erkən mərhələdə dəstək müalicəsi idrak zəifləməsinin və mümkün beyin zədələrinin qarşısını ala bilər.