Səhiyyə Nazirliyinin Elmi-Tədqiqat Kardiologiya İnstitutu tərəfindən “Respublikada TAVİ əməliyyatı: təcrübəmiz nə göstərdi?” mövzusunda ekspert müzakirə masası təşkil olunub.

Azmedinfo.az xəbər verir ki, tədbirdə İcbari Tibbi Sığorta üzrə Dövlət Agentliyinin Tibbi Planlama Departamentinin rəhbəri, professor Hikmət İbrahimli, Mərkəzi Klinikanın baş həkimi, professor Kamran Musayev, İTS-in İdarə Heyətinin sədr müşaviri Nelli Veysova, Azərbaycan Kardioloqlar Cəmiyyətinin sədri Ülvi Mirzoyev, həmçinin ölkənin tanınmış kardioloq və kardiocərrahları iştirak ediblər.

Müzakirəyə professor Gülnaz Dadaşova açılış nitqi ilə başlayaraq, ölkədə TAVİ (Transkateter Aortal Klapan İmplantasiyası) əməliyyatlarının hazırkı vəziyyəti, aparılan işlər və gələcək hədəflər barədə məlumat verib. O, bu sahədə təcrübə paylaşımının və elmi-praktik müzakirələrin vacibliyini vurğulayıb.

Tədbirdə tibb üzrə fəlsəfə doktoru, dosent Təranə Cavadova “Azərbaycan Respublikasında TAVİ əməliyyatının aparılması: mövcud vəziyyət”, Oqtay Musayev “Dünya təcrübəsində TAVİ əməliyyatı”, İlqar Tahiroğlu isə “TAVİ komplikasiyaları” mövzularında çıxış edərək, həm yerli, həm də beynəlxalq təcrübəni iştirakçıların diqqətinə çatdırıblar.

Müzakirələr zamanı TAVİ və açıq ürək əməliyyatı arasında müqayisələr, əməliyyatdan sonrakı erkən və gecikmiş nəticələr, ağırlaşmaların və ölüm hallarının qarşısının alınması, prosedurun ölkə üzrə yayılması və səhiyyə sisteminə inteqrasiyası kimi bir sıra vacib məsələlərə toxunulub. Ekspertlər, həmçinin mövcud təcrübənin region və dünya statistikası ilə müqayisəsini apararaq, gələcəkdə atılmalı addımlar və inkişaf perspektivləri barədə fikir mübadiləsi aparıblar.

Tədbir iştirakçıların suallarının cavablandırılması və ümumi yekunlarla başa çatıb.