Yay aylarında hava temperaturunun yüksəlməsi qida məhsullarında mikroorqanizmlərin sürətlə çoxalması üçün uyğun mühit yaradır. Xüsusilə, açıq havada istehlak edilən və ya doğru şəraitdə saxlanmayan məhsullar qida zəhərlənməsinə və infeksiyaya yol açır.

Azmedinfo.az türkiyəli yoluxucu xəstəliklər və kliniki mikrobiologiya mütəxəssisi, dosent Fatma Əsərin mövzu ilə bağlı ekspert açıqlamasını oxuculara təqdim edir.

F.Əsərin sözlərinə görə, qidaların vaxtından əvvəl xarab olmasına səbəb olan ən böyük faktor soyuq hava zəncirinin pozulmasıdır.

O, çöldə satılan yeməklərin, səyahət və açıq havada piknik mühitinin qidaların xarab olmasına zəmin yaratdığını xatırladaraq, "istehlak edilən qida məhsullarının sağlam və təhlükəsiz olmasını təmin etmək vacibdir. Mümkün olduqca,  küçə yeməklərindən uzaq durmaqla, etibarlı mənbədən su və digər sərinləşdirici içkiləri istehlak etmək mütləqdir" - deyə diqqətə çatdırıb.

Mütəxəssisin fikrincə, infeksiyaların qarşısının alınmasında əl gigiyenası - əllərin sabun və su ilə tez-tez yuyulması çox vacibdir.

İsti yay günlərində bəzi qida məhsullarından istifadə edərkən daha diqqətli olmaq vacibdir. Məsələn, tort və bu kimi kremli qidalar, yumurta, toyuq əti kimi məhsullar xarab olmağa daha meyllidirlər

Yüksək  xarabolma riski daşıyan qidalar mütləq soyuducuda saxlanmalıdır. Soyuducudan kənarda qalan bişməmiş qidalar da mikroorqanizmləri çoxaldaraq xəstəliyə səbəb ola bilirlər.

Ekspert qida zəhərlənməsinin ilk əlamətlərinin adətən ürəkbulanma, qusma və ishal olduğunu ifadə edib. Onun sözlərinə görə, mümkün olduqca çox maye qəbul etmək vacibdir. Bu infeksiyalar adətən bir-iki gün ərzində  özlərini məhdudlaşdırır və yox olur. Əgər xəstə yuxarıda sadalananlarla yanaşı, yüksək temperatur və yorğunluq hissindən də şikayət edirsə, kifayət qədər maye qəbul edə bilmirsə, o zaman yaxınlıqdakı tibb müəssisəsinə müraciət etməlidir.