Müşahidələr və araşdırmalar göstərir ki, müxtəlif ölkələrdə fəaliyyət göstərən məktəblərin əksəriyyəti fövqəladə tibbi hallara hazır olmaq məqsədilə vacib tədbirlər görsə də, bir çoxları hələ də bu istiqamətdə müəyyən addımlar atmalı, təcili tibbi yardım üçün hazırlıqlarını təkmilləşdirməlidirlər.

Azmedinfo.az xəbər verir ki, amerikalı alimlərin araşdırması nəticəsində əldə edilən statistik rəqəmlər əsasında orta məktəblərdə təcili və təxirəsalınmaz tibbi yardım çağırışının əsas səbəbləri aşkarlanıb. Bu səbəblər daha çox qıcolmalar, psixi pozğunluqlar, narkotik asılılığı və travma kimi nevroloji böhranlardır.

Tədqiqat dövründə məktəblilərin təcili tibbi yardıma müraciət etmələrinin 11 %-i məktəbəsaslı tibbi yardım üçün olub. Bunların üçdə ikisi xəstəxanaya çatdırılma ilə nəticələnib.

Tədqiqatın nəticələri məktəblərə təlimi prioritetləşdirməyə kömək edə bilər. Bununla da, pedaqoji heyət və digər məktəb əməkdaşları təcili və təxirəsalınmaz tibbi xidmət çağırışa gələnədək tibbi yardım üçün vacib addımları atacaqlar.

Araşdırma nəticəsində məlum olub ki, ibtidai sinif şagirdləri arasında fiziki xəsarətlər (17%), ruhi sağlamlıq problemləri və maddə asılılığı isə yeniyetmələr arasında (18%) daha çox olub.

Amerikalı tədqiqatçıların qənaətincə, gənclər arasında davam edən psixi sağlamlıq böhranı psixiatrik vəziyyətlər və narkotik maddələrdən sui-istifadə səbəbindən məktəblərdə ortaya çıxan təcili tibbi yardım ehtiyacını izah edir.

Aparılan tədqiqatların ümdə məqsədi uşaqların sağlamlığının yaxşılaşdırılması, pediatriyanın inkişaf etdirilməsi, yorulmaz araşdırmalarla daha sağlam gələcəyin təmin olunmasıdır.