Britaniyanın Lids Universitetində aparılan tədqiqat nəticəsində məlum olub ki, mağaza rəflərində alıcılara təqdim edilən hər üç uşaq qidası məhsulundan biri həddindən artıq emal olunmuş qidadır. Bu qidalar uşaqların sağlamlığına uzunmüddətli, ciddi ziyan vurmaq iqtidarındadırlar.

Azmedinfo.az xəbər verir ki, araşdırmanın müəllifləri, həmçinin valideynlərə sənaye üsulu ilə istehsal edilən qidaların tərkibindəki təbii inqrediyentləri reklam edən aldadıcı qablaşdırma barədə də xəbərdarlıq ediblər.

İngiltərəli mütəxəssislər tanınmış qida müəssisələri tərəfindən istehsal olunan 600 uşaq qidası məhsulunu təhlil ediblər. Tədqiqatın nəticəsində körpə qəlyanaltılarının 87 %-i və sıyıqların 79 %-i ultra emal olunmuş qidalar kimi təsnif olunub. Bu o deməkdir ki, həmin qida nümunələri adətən ev yeməklərində tapılmayan inqrediyentlərdən istifadə edilməklə sənaye üsulu ilə istehsal olunublar.

Onlar həmçinin uşaqlar üçün nəzərdə tutulmuş məşhur qəlyanaltılarda, o cümlədən "ərimiş" şişirdilmiş qida nümunələrində, meyvə əsaslı çeynəmələrdə və batonlarda "narahatedici tendensiyalar" aşkarlayıblar.

Lids Universitetində aparıcı tədqiqatçısı və uşaq qidası mütəxəssisi doktor Dayan Triplton qeyd edir ki, marketlərdə və ərzaq mağazalarında həddindən çox emal edilmiş qəlyanaltılar, şirniyyatlar, sıyıqlar və digər uşaq qidaları üstünlük təşkil edir. Onlar adətən sağlam, üzvi və ya şəkər əlavə edilməmiş keyfiyyətli qida kimi reklam olunsalar da, əslində onlar həddindən artıq emal olunurlar və tərkibində uşaq sağlamlığına ciddi ziyan vuran zərərli maddələr var. Körpələrin böyüməsi üçün lazım olan vacib qidalara, demək olar ki, heç bənzəmirlər.

Bu qidalar körpələrdə ilk andan ultra emal olunmuş, həddən artıq şirin qidalara həvəs yaradır. Hökumət şəkərli qida məhsullarının yanıldıcı etiketli satışını dayandırmaq üçün təcili tədbir görməlidir.

Britaniya Sağlamlıq və Piylənmə ilə Mübarizə Alyansının direktoru Ketrin Cennerin sözlərinə görə, hökumətin 10 illik sağlamlıq planı piylənmə ilə mübarizə üçün sürətli səylərdən bəhs edir, lakin erkən yaşda bu boşluq aradan qaldırılmasa, qarşıya qoyulan məqsədə nail olmaq mümkün deyil. "Sağlam həyat doğuşdan başlayır. Hazırda biz körpələri və azyaşlı uşaqları onların inkişafına və uzunmüddətli sağlamlığına xələl gətirən ultra emal olunmuş qidalarla qidalandırırıq” – deyə, K.Cenner vurğulayıb.