Ağciyər Xəstəlikləri Mərkəzinin Şəmkir Regional Xəstəxanasının açılışı oldu.

Azmedinfo.az xəbər verir ki, tədbirdə TƏBİB-in İcraçı direktorunun müşaviri Anar Ağayev, Ağciyər Xəstəlikləri Mərkəzinin direktoru Nəhmət Rəhmanov, Şəmkir Rayon İcra Hakimiyyətinin başçısı Rəşad Tağıyev, Elmi-Tədqiqat Ağciyər Xəstəlikləri İnstitutunun direktoru İradə Axundova, eləcə də Səhiyyə Nazirliyinin, Şəmkir Regional Xəstəxanasının və Ağciyər Xəstəlikləri Mərkəzinin regional qurumlarının nümayəndələri iştirak etdilər.

Yeni yaradılan Mərkəz barədə açılış iştirakçılarına məlumat verən Nəhmət Rəhmanov diqqətə çatdırdı ki, müəssisədə ağciyərin spesifik və qeyri spesifik xəstəliklərinin diaqnostikası, ambulator və stasionar müalicəsi, o cümlədən vərəmlə mübarizə sahəsində profilaktik tədbirlərin həyata keçirilməsi üçün lazımi şərait var. Onun sözlərinə görə, Regional Xəstəxana yalnız Şəmkir əhalisinə deyil, ətraf bölgələrdə yaşayan vətəndaşlara xidmət göstərəcək. Onun xidmət arealı ümumilikdə 2 şəhər və 9 rayonu əhatə edəcək. 2,5 hektar ərazini əhatə edən xəstəxanada 207 nəfərlik işçi heyət fəaliyyət göstərəcək.

Tədbirdə vurğulanıb ki, Tibb müəssisəsinin strukturuna Təcili yardım bölməsi, Ambulator şöbə, 100 çarpayılıq 5 stasionar şöbə, inzibati və təsərrüfat şöbələri və eləcə də digər köməkçi sahələr daxildir.

Şəmkir Regional Xəstəxanasınən gələcək fəaliyyətinin hədəfində vərəm diaqnostikasının təkmilləşdirilməsi, pasiyentlərin aktiv müalicəyə cəlb edilməsi və genişmiqyaslı profilaktik tədbirlərin həyata keçirilməsi nəticəsində bölgədə spesifik və qeyri-spesifik tənəffüs sistemi xəstəliklərinin epidemioloji vəziyyətinin yaxşılaşdırılması dayanır.