Rusiya Dövlət Dumasının deputatları ölkəyə daxil olan əmək miqrantları üçün yeni tibbi tələbləri nəzərdə tutan qanun layihəsi hazırlayıblar.

Azmedinfo.az "Gazeta" nəşrinə istinadən yazır ki, bu barədə parlamentin Əmək, sosial siyasət və veteran məsələləri komitəsinin sədri Yaroslav Nilov məlumat verib.

Layihəyə əsasən, miqrantlardan Rusiya ərazisinə daxil olduqları zaman tibbi sığorta sənədi ilə yanaşı, bir sıra yoluxucu xəstəliklərə dair test nəticələri də tələb olunacaq.

Söhbət immun çatışmazlığı virusu (İİV), B və C hepatiti, sifilis və vərəm kimi xəstəliklərin yoxlanılmasından gedir. Vərəm testi daxil olmaqla bu analizlərin etibarlılıq müddəti 10 gün, narkotik vasitələrin istifadəsinə dair testin isə 72 saat olacaq.

Qanun layihəsinin müəllifləri hesab edirlər ki, bu dəyişikliklər ölkənin səhiyyə sisteminə olan təzyiqi azaldacaq. Hazırda miqrantlardan yalnız tibbi sığorta təqdim etmələri tələb olunur. Yeni qaydalar qəbul olunduğu halda, sağlamlıq göstəricilərinə nəzarət daha ciddi şəkildə həyata keçiriləcək.