Səhiyyə Nazirliyi Elmi-Tədqiqat Kardiologiya İnstitutunun Arterial Hipertenziya şöbəsinin müdiri Tofiq Cahangirov zərərli vərdişlərin ürək-damar sisteminə təsirləri ilə bağlı mühüm məqamlara diqqət çəkib.

Azmedinfo.az xəbər verir ki, mütəxəssisin sözlərinə görə, spirtli içkilərin davamlı istifadəsi ürək əzələsinə birbaşa toksik təsir göstərərək alkoqollu kardiomiopatiya yaradır və nəticədə ürək çatışmazlığı riski yüksəlir. Spirt həmçinin ürək ritminin pozulmasına, yüksək qan təzyiqinə, insult və infarkt hallarına səbəb olur. Uzunmüddətli istifadə damar divarlarında aterosklerotik dəyişiklikləri sürətləndirir və qan dövranı üçün ciddi təhlükə yaradır.

Tofiq Cahangirov siqaretin də ürək-damar sağlamlığını zədələdiyini vurğulayıb. O bildirib ki, siqaret damar divarının endotel qatını zədələyir, elastikliyi azaldır və qan axınını çətinləşdirir. Eyni zamanda, lipid balansını pozaraq “pis” xolesterinin səviyyəsini artırır, tromb yaranmasını sürətləndirir və infarktla insult riskini dəfələrlə artırır.

Ekspertin sözlərinə görə, spirtli içki və siqaret birlikdə istifadə olunduqda onların təsiri sinergik xarakter daşıyır və infarkt riski 5–10 dəfə yüksəlir. Gənc yaşda bu vərdişlərə başlayan insanlarda ürək-damar xəstəlikləri daha erkən üzə çıxır.

Tofiq Cahangirov siqaretdən imtinanın bərpa prosesində mühüm rol oynadığını da qeyd edib: “Siqaretdən imtina etdikdən bir il sonra koronar ürək xəstəliyi riski 50 faiz azalır, damarların iltihabi prosesi və oksidativ stress isə xeyli dərəcədə zəifləyir”.

Həkim əlavə edib ki, təsdiqlənmiş ürək-damar xəstəlikləri, şəkərli diabet, ağciyər patologiyaları, qaraciyər və mədəaltı vəzin xəstəlikləri, hamiləlik və onkoloji hallarda spirt və siqaretdən tamamilə imtina edilməlidir.

“Ürək-damar sağlamlığını qorumağın əsas yolu erkən profilaktika, zərərli vərdişlərin tərgidilməsi və sağlam həyat tərzidir. Sağlam ürək – sağlam gələcəyin və uzun ömrün əsas təminatıdır”, – deyə Tofiq Cahangirov vurğulayıb.