Son illərin elmi araşdırmaları göstərir ki, bariatrik cərrahiyyə təkcə artıq çəki və piylənmə ilə mübarizə vasitəsi deyil, həm də xərçəng riskinin azalmasına mühüm təsir göstərir. Xüsusilə də alkoqolsuz qaraciyər xəstəliyi (NAFLD) olan pasiyentlərdə aparılan genişmiqyaslı tədqiqatlar bu əməliyyatların xərçəng inkişafı riskini demək olar ki, 2 dəfə azaltdığını ortaya qoyub.

Azmedinfo.az xəbər verir ki, bu sözləri ümumi cərrahiyyə üzrə uzman Rəşad Əliyev bildirib. Onun sözlərinə görə, ən çox rast gəlinən kolorektal xərçəng, pankreas, endometrial və qalxanabənzər vəz xərçəngləri, həmçinin qaraciyər hüceyrəli karsinoma və çoxsaylı miyeloma riskində nəzərəçarpacaq azalma müşahidə olunub.

Maraqlıdır ki, sirozu olan xəstələrdə bu azalma 38%, siroz olmayanlarda isə 52% təşkil edib. Bu fakt bariatrik əməliyyatların təsir mexanizminin təkcə çəkini azaltmaqla məhdudlaşmadığını, həm də orqanizmdəki metabolik və hormonal dəyişikliklərin xərçəng riskinə birbaşa təsir göstərdiyini deməyə əsas verir.

Əlbəttə, bariatrik əməliyyat aqressiv bir müdaxilədir, lakin düzgün seçilmiş pasiyentlərdə bu addım həyat keyfiyyətini yüksəldir, uzunmüddətli sağlamlıq nəticələrini yaxşılaşdırır və səhiyyə sistemində əlavə xərclərin azalmasına səbəb olur. Bu səbəbdən də, piylənmə və NAFLD ilə yanaşı xərçəng riski yüksək olan pasiyentlərdə bariatrik cərrahiyyə həm tibbi, həm də sosial baxımdan mühüm əhəmiyyət kəsb edir.”