İnfeksionist həkim mədə və bağırsaq infeksiyaları barədə mühüm açıqlama edib

19 Noyabr 2025

878

İnfeksionist həkim mədə və bağırsaq infeksiyaları barədə mühüm açıqlama edib

Mədə və bağırsaq infeksiyaları əsasən qida və su ilə keçən virus, bakteriya və ya parazitlərin səbəb olduğu xəstəliklərdir.

Azmedinfo.az xəbər verir ki, Kliniki Tibbi Mərkəzin Yoluxucu Xəstəliklər şöbəsinin müdiri, həkim-infeksionist Xatirə Əliyeva mədə və bağırsaq infeksiyalarına səbəb olan amilləri sadalayıb:

• Çirkli və ya düzgün bişirilməmiş qida

• Çirkli içməli su və ya çirkli hovuz suları

• Əllərin yuyulmaması və infeksiyalı şəxslərlə təmas

• Zoonoz yoluxmalar (heyvan məhsulları vasitəsilə)

Həkim mədə və bağırsaq infeksiyalarının yaratdığı təhlükələr haqqında danışıb. Ekspert bildirib ki, mədə və bağırsaq infeksiyaları vaxtında müalicə edilmədikdə ciddi fəsadlara səbəb ola bilər: “Mədə və bağırsaq infeksiyaları, əsasən qida və su ilə keçən viruslar, bakteriyalar və ya parazitlər səbəbindən yaranır və çox geniş yayılmış sağlamlıq problemidir. Bu infeksiyalar bağırsaq və mədə mukozasında iltihab yaradır, nəticədə həzm prosesi pozulur.

Qeyd edib ki, xəstəliyin əsas əlamətləri ishal, qusma və qarın ağrısıdır. Bəzən xəstə qızdırma, halsızlıq, baş gicəllənməsi və iştahsızlıq da hiss edir. Bu əlamətlər adətən 1–7 gün davam edə bilər, lakin xüsusilə uşaqlar, yaşlılar və xroniki xəstələrdə daha uzun sürə və şiddətli ola bilər.

"Vaxtında müalicə olunmadıqda, mədə və bağırsaq infeksiyaları ciddi fəsadlara səbəb ola bilər. Ən çox rast gəlinən fəsad dehidrasiya və elektrolit pozğunluqlarıdır, çünki ishal və qusma nəticəsində bədən maye və mineral itirir. Bu vəziyyət ürək ritminin pozulması, əzələ zəifliyi və halsızlıq kimi problemlərə gətirib çıxara bilər. Daha ağır hallarda isə bakterial infeksiyalar qan dövranına yayıla bilər və sepsis kimi həyati təhlükəli vəziyyətlər yarana bilər. Həmçinin bəzi hallarda infeksiya böyrək problemlərinə və ya uzunmüddətli xroniki bağırsaq xəstəliklərinə səbəb ola bilər", - deyə həkim vurğulayıb.

Ekspert mədə və bağırsaq infeksiyalarının müalicəsi yollarla barədə qeyd edib ki, müalicə xəstəliyin dərəcəsindən aslı olaraq dəyişir: “Mədə və bağırsaq infeksiyalarının əsas müalicəsi ilk növbədə mayenin bərpasıdır. Əgər qusma və ishal yüngül keçirsə, çox vaxt dərmana ehtiyac olmur. Amma hərarət yüksəkdirsə, qanlı ishal və güclü qarın ağrısı varsa, bu artıq bakterial infeksiyadan xəbər verir və həkim nəzarəti tələb edir. Antibiotik yalnız lazım olan hallarda təyin olunur”.