Sinir ağrıları sinirlərin zədələnməsi, sıxılması və ya iltihabı nəticəsində yaranan spesifik ağrı növüdür. Bu ağrılar adətən yanma, iynəbatma, keyimə, həssaslığın artması və uzunmüddətli davamlılıq ilə xarakterizə olunur.

Azmedinfo.az xəbər verir ki, Kliniki Tibbi Mərkəzin həkim-nevroloqu Durna Ələkbərovanın sözlərinə görə, sinir ağrıları əzələ sisteminə ciddi təsir göstərir. Əzələ fəaliyyəti sinir impulsları ilə idarə olunduğundan, sinirlərin zədələnməsi əzələnin impulsu tam ala bilməməsinə və nəticədə zəiflik, titrəmə və koordinasiya pozğunluğuna səbəb olur.

Uzun müddət davam edən sinir ağrıları xroniki əzələ yorğunluğuna gətirib çıxarır, psixoloji durumu zəiflədir və ən nəhayət, bel yırtığı və periferik neyropatiyalar kimi hallarda əzələ atrofiyası (incəlmə və güc itkisi) ilə nəticələnə bilər.

Müalicənin əsas məqsədi sinir toxumasındakı qıcıqlanmanı azaltmaq və xəstənin rahatlığını bərpa etməkdir. Bu, xüsusi sinir sakitləşdirici preparatlarla, fizioterapiya və gücləndirici məşqlərlə aparılır. Əgər ağrının kökü sinir sıxılmasıdırsa, müalicənin ən fundamental mərhələsi məhz həmin sıxılmanın aradan qaldırılmasıdır.