Özəl xəstəxananın ümumi uğuru hər bir şöbənin fəaliyyətinin düzgün təşkilindən və effektivliyindən birbaşa asılıdır. Lakin sual doğur ki, şöbələrin fəaliyyəti necə obyektiv şəkildə dəyərləndirilə bilər?

Azmedinfo.az Dr. Cəbrayıl Abbasovun qısa məqaləsini təqdim edir:

Elmi yanaşmaya əsasən, şöbələrin fəaliyyətinin qiymətləndirilməsi üç əsas istiqamətdə aparılmalıdır:

Klinik göstəricilər

Bu istiqamət pasiyentlərin sağalma faizi, təkrar müraciətlərin sayı, icra olunan prosedur və əməliyyatların uğur dərəcəsi kimi birbaşa tibbi nəticələri əhatə edir.

Xidmət keyfiyyəti

Bu, pasiyent məmnuniyyəti sorğuları, gözləmə müddətinin optimal səviyyəsi və həkim–pasiyent ünsiyyətinin yüksək səviyyəsi ilə ölçülür.

Maliyyə və resurs səmərəliliyi

Bu kateqoriya gəlir–xərc nisbəti, mövcud avadanlıqdan istifadə səmərəliliyi və işçi heyətinin ümumi məhsuldarlığı kimi idarəetmə meyarlarını əhatə edir.

Effektiv idarəetmə üçün hər bir şöbə yalnız əldə etdiyi tibbi nəticələrə görə deyil, həm də təqdim etdiyi xidmətin keyfiyyəti və resursların idarə edilməsi baxımından ölçülməlidir. Bu kompleks yanaşma klinikanın davamlı inkişafını və bazarda yüksək rəqabət qabiliyyətini təmin edən əsas şərtdir.