Tanınmış həkim sadə görünən ürək qüsurunun arxasındakı əlavə patologiyalardan danışdı

29 Noyabr 2025

474

Tanınmış həkim sadə görünən ürək qüsurunun arxasındakı əlavə patologiyalardan danışdı

Qulaqcıqlar arası çəpərin defekti, xüsusilə də diaqnostik baxımdan çətin görünən sinus venozus tip ASD-lər, yanaşı olaraq anomal pulmonar venoz dönüş ilə birlikdə rast gəlindikdə son dərəcə diqqət tələb edir.

Azmedinfo.az xəbər verir ki, bu barədə Azərbaycan Respublikası Dövlət Gömrük Komitəsi Tibbi Xidmət İdarəsinin Elmi-Təcrübi və Tədris Mərkəzinin rəisi Rəşad Mahmudov sosial hesabında paylaşım edib.

Sadə görünən bir interatriyal defekt anlayışı bəzən aldatıcı ola bilər. Çünki belə hallarda əsas problemin arxasında gizlənmiş əlavə anatomik patologiyalar gözardı edilə və bu da son nəticədə ağır klinik fəsadlara gətirib çıxara bilər.

Bu qrup xəstələrdə ən ciddi risklərdən biri yuxarı və aşağı boş venaların (Vena cava superior və inferior) stenozu və ya sonradan yaranan kaval sindromlarıdır. Bu fəsadların qarşısını almaq üçün əməliyyatdan əvvəl və əməliyyat zamanı bütün anatomik strukturların yüksək dəqiqliklə qiymətləndirilməsi, hər bir anatomik detalın “yüz ölçülüb bir biçilməsi” və qərarların yalnız tam anatomik xəritələndirmədən sonra verilməsi mütləqdir.

Bu, bizim gündəlik praktikada tətbiq etməli olduğumuz ən vacib prinsiplərdən biridir. Hansı ki, sadə görünən patologiyanın arxasında komplekslik axtarmaq və heç bir detalı nəzərdən qaçırmamaq.