Uşaqlıq mioması uşaqlığın əzələ qatında əmələ gələn xoşxassəli şişdir. Bu, qadınlarda ən çox rast gəlinən ginekoloji xəstəliklərdən biridir.

Azmedinfo.az xəbər verir ki, Kliniki Tibbi Mərkəzin Ginekologiya şöbəsinin müdiri Qubaxanım Hacızadəsözlərinə görə, uşaqlıq miomasının əlamətləri müxtəlif ola bilər. Ən çox rast gəlinən simptomlar uzun və çoxlu menstrual qanaxma, qarında ağırlıq, şişkinlik və ağrı, bel ağrısı, sidiyə tez-tez getmə və ya qəbizlikdir. Mioma həmçinin sonsuzluq və ya hamiləliyin düşməsinə səbəb ola bilər. Bəzi hallarda isə miomada heç bir əlamət olmur və xəstəlik təsadüfən ultrasəs (USM) müayinəsində aşkar edilir.

"Uşaqlıq mioması xərçəng növü deyil. Bu diaqnoz xəstələrdə narahatlıq yaratsa da, mioma xoşxassəli şişdir və çox nadir hallarda bədxassəli formaya keçir. Miomanın təhlükəli olub-olmaması onun ölçüsündən, yerləşməsindən və yaratdığı əlamətlərdən asılıdır. Kiçik və simptom verməyən miomalar adətən problem yaratmır və sadəcə müşahidə altında saxlanılır. Lakin mioma böyüdükcə və uşaqlığın iç qatına doğru inkişaf etdikcə, anemiyaya səbəb olan çoxlu qanaxmalara, qarında ağırlıq hissinə, bel ağrılarına və sonsuzluğa səbəb ola bilər", - deyə həkim bildirib.

Q. Hacızadə qeyd edib ki, mioma hamiləlik üçün də təhlükə sayıla bilər. Daxili miomalar embrionun uşaqlıq daxilində yerləşməsini çətinləşdirə və düşüklərə səbəb ola bilər. Buna görə də, hamilə qalmaq istəyən qadınlarda miomanın ölçüsü və yeri diqqətlə qiymətləndirilməlidir. Təhlükə həmçinin uzun müddət müşahidəsiz qalan miomaların böyüyərək cərrahi müdaxilə tələb etməsindən ibarətdir. Müasir dövrdə miomalar həm dərmanla, həm də minimal invaziv üsullarla, yəni laparoskopiya və embolizasiya vasitəsilə müalicə edilə bilər.