Mədə poliplərinin müalicəsi polipin növü, ölçüsü və xərçəngə çevrilmə riski nəzərə alınaraq fərdi şəkildə müəyyən edilir.

Azmedinfo.az xəbər verir ki, qastroenteroloq, hepatoloq, invaziv endoskopist Dr. Aqil Ağakişiyevin sözlərinə görə, kiçik və xoşxassəli poliplərə, xüsusilə hiperplastik növlərə, adətən mütəmadi endoskopik üsullarla nəzarət edilir. Lakin ölçüsü 1 sm-dən böyük olan və ya yüksək risk daşıyan adenomatoz poliplər mütləq şəkildə əməliyyat edilməlidir.

Ən çox tətbiq olunan üsul endoskopik polipektomiyadır. Bu zaman polip qastroskopiya proseduru ilə, yəni kəsiksiz şəkildə xaric edilir. Əgər polipdə xərçəng hüceyrələri aşkarlanarsa, cərrahi müdaxilə tələb oluna bilər. Qeyd etmək vacibdir ki, polipləri dərman vasitəsilə “əridən” və ya tam aradan qaldıran sübut olunmuş müalicə yoxdur. Buna görə də dəqiq və təhlükəsiz müalicə planı üçün qastroenteroloqun müayinəsi və biopsiya nəticələrinin qiymətləndirilməsi mütləqdir.