Ürək-damar xəstəlikləri qlobal ölüm səbəbləri arasında öncül yerlərdən birini tutur və miokard infarktı vaxtında qarşısı alınmadıqda ciddi fəsadlarla nəticələnir.

Azmedinfo.az xəbər verir ki, Mingəçevir Şəhər Mərkəzi Xəstəxanasının həkim-kardioloqu Bənövşə Əhmədovanın sözlərinə görə, infarkt adətən koronar damarların ateroskleroz səbəbindən daralması və ya tam tutulması nəticəsində yaranır, bu da illərlə yığılan risk faktorlarının təsiri altında formalaşır.

Kardioloq infarkt riskini artıran əsas səbəblərin yüksək qan təzyiqi, yüksək xolesterol və triqliseridlər, şəkərli diabet, siqaret çəkmək, artıq çəki və hərəkətsizlik, gərginlik, irsi meyillilik və düzgün olmayan qidalanma olduğunu qeyd edib.

Ekspert vurğulayıb ki, bu risk faktorlarının əksəriyyəti insanın öz nəzarəti altındadır və vaxtında müdaxilə infarkt ehtimalını əhəmiyyətli dərəcədə azalda bilər. Həmçinin sağlam qidalanma, aktiv həyat tərzi, siqaretdən uzaq durmaq, təzyiq və şəkər səviyyəsinin mütəmadi monitorinqi vacibdir.

Həkim xəbərdarlıq edir ki, nəfəs darlığı, döş qəfəsində ağırlıq, sol qolda uyuşma kimi əlamətlər yaranarsa, dərhal tibbi yardım almaq həyati əhəmiyyət daşıyır.

Kardioloq vətəndaşları öz sağlamlıqlarına məsuliyyətlə yanaşmağa çağırıb: “Unutmayaq ki, infarkt ani baş verir, amma onun qarşısını almaq bizim əlimizdədir.”