Yaş artdıqca sümük toxumasının zəifləməsi və sıxlığının azalması təbii bir proses olsa da, düzgün yanaşma ilə bu gedişatı ləngitmək mümkündür.

Azmedinfo.az xəbər verir ki, endokrinoloq həkim Fərhad Burzunun sözlərinə görə, sümüklərin zamanla nazikləşərək osteoporoz riskini artırmasına qarşı erkən yaşlardan profilaktik tədbirlər görülməlidir.

"Sümük sağlamlığına genetika və yaşla yanaşı, qidalanma, fiziki aktivlik və hormonal balans kimi bir çox mühüm amillər birbaşa təsir göstərir. Xüsusilə kalsium və D vitamini çatışmazlığı, az hərəkətli həyat tərzi və zərərli vərdişlər sümük zəifləməsini daha da sürətləndirən əsas faktorlardır",- deyə həkim bildirib.

Ekspert qeyd edib ki, güclü sümük strukturuna sahib olmaq üçün gündəlik rasionda tərəvəzlərə və kalsiumla zəngin qidalara xüsusi yer verilməli, bu elementin mənimsənilməsi üçün D vitamini balansı qorunmalıdır. Eyni zamanda, yerimə, qaçış və rəqs kimi fəaliyyətlərlə yanaşı, ağırlıq və müqavimət məşqləri də sümük toxumasını möhkəmləndirərək itkilərin qarşısını alır.

Endokrinoloq sümükləri uzun illər güclü saxlamağın əsas şərti kimi siqaret və alkoqoldan uzaq durmağı və müntəzəm müayinələrdən keçməyi tövsiyə edib.