Onikibarmaq bağırsaq xorası bağırsağın selikli qişasında yaranan dərin zədələnmədir. Xəstəliyin əsas səbəblər arasında xüsusilə Helicobacter pylori infeksiyası ön plana çıxır.

Azmedinfo.az xəbər verir ki, qastroenteroloq, hepatoloq və invaziv endoskopist Dr. Aqil Ağakişiyevin sözlərinə görə, bu xəstəliyin həm infeksion, həm də dərman mənşəli, eləcə də streslə bağlı müxtəlif formaları mövcuddur və hər biri fərqli yanaşma tələb edir.

Onun bildirdiyinə əsasən, ağrıkəsici və iltihabəleyhinə preparatların uzunmüddətli qəbulu, ağır xəstəliklər və travmalar xoraların yaranmasına zəmin yarada bilər.

Həkim qeyd edib ki, xəstəlik kəskin və ya xroniki formada inkişaf edə, bəzi hallarda qanaxma, perforasiya və ya bağırsaq keçməzliyi kimi ciddi ağırlaşmalarla müşayiət oluna bilər.

Mütəxəssis vurğulayır ki, xəstəlik təhlükəli görünsə də, erkən diaqnostika və düzgün müalicə ilə ağırlaşmaların qarşısını almaq və xəstənin həyat keyfiyyətini qorumaq mümkündür.