Milli Onkologiya Mərkəzində baş verən o ağır hadisə hamımızı sarsıtdı. Bədbəxt hadisə nəticəsində ağır yaralanan həkim-radioloq Asif Nəsirli həkim-radioloq Asif Nəsirlinin vəziyyəti kritik olaraq qalır.

Lakin bəlkə də hadisənin özündən daha ağrılı olan məqam insanların buna verdiyi reaksiyalardır. Sosial şəbəkələrdəki şərhləri oxuduqca insanın ürəyi sıxılır, vicdanı sızlayır...

Heç bir həkim istəməz ki, xəstəsi əziyyət çəksin. Heç bir peşə sahibi illərlə oxuyub, gecə-gündüz çalışıb, çiyinlərində bu qədər məsuliyyət daşıyıb sonda kiməsə zərər vermək üçün bu yolu seçməz. Həkimlərin ən böyük arzusu və mükafatı sadəcə bir şeydir — xəstənin sağalması.

Bir anlıq təsəvvür edin... Əgər sabah həkimlər “artıq bacarmırıq” deyib əməliyyatları dayandırsalar, xəstəxana qapıları bağlansa, təcili yardımlar sussa... O zaman bu gün nifrət dolu sözlər yazanlar, sabah ilk yardım üçün qapı döyənlər olmayacaqlarmı?

Bir məqamı da xüsusi vurğulamaq istəyirəm. Reytinq xatirinə hər kəsə “qazi” adı verib, Vətən üçün canından keçməyə hazır olan əsl qazilərin haqqına girənlərə bir sözüm var: Müharibə vaxtı anasının ətəyi altında gizlənənlər "qazi" anlayışının müqəddəsliyini heç vaxt düzgün dəyərləndirə bilməzlər. Unutmayın ki, əsl qazi öz həkiminə, öz vətəndaşına heç vaxt qıymaz!

P.S. Vətən Müharibəsi Veteranı, həkim-stomatoloq Üzeyir Seyidzadə