Endokrin cərrahiyyədə qalxanabənzər vəz əməliyyatı izah edilib

07 May 2026

284

Endokrin cərrahiyyədə qalxanabənzər vəz əməliyyatı izah edilib

ATU-nun Tədris Cərrahiyyə Klinikasının endokrin cərrahı Esmira Məmmədova qalxanabənzər vəzi xəstəlikləri və aparılan cərrahi müalicə barədə məlumat verib.

Azmedinfo.az xəbər verir ki, həkimin sözlərinə görə, uzun müddətdir qalxanabənzər vəzində düyünlər olan xəstə sıxılma və boğulma hissi kimi şikayətlərlə klinikaya müraciət edib. Aparılan müayinələr zamanı vəzidə çoxsaylı düyünlərin olduğu və son aylarda onların böyümə tendensiyası göstərdiyi müəyyən edilib. Xəstəyə total tiroidektomiya əməliyyatı icra olunub.

Bu, qalxanabənzər vəzinin tamamilə xaric edilməsi deməkdir və çoxsaylı düyünlər, eləcə də sıxılma simptomları səbəbilə seçilən müalicə üsuludur.

E.Məmmədova bildirib ki, əməliyyat zamanı səs tellərini innervasiya edən qayıdan qırtlaq sinirinin qorunması üçün xüsusi sinir monitorinq cihazından istifadə edilir. Bu, mümkün sinir zədələnməsinin qarşısını almağa imkan verir.

Cərrah qeyd edib ki, Azərbaycanda qalxanabənzər vəzi xəstəliklərinə tez-tez rast gəlinir və bu tip müraciətlər kifayət qədər çoxdur. Əməliyyatın özü təxminən 40 dəqiqə davam edir, hazırlıq prosesi ilə birlikdə ümumi müddət təxminən bir yarım saat təşkil edir. Onun sözlərinə görə, qalxanabənzər vəz tam xaric edildiyi üçün əməliyyatdan sonra xəstəliyin yenidən yaranması (residiv) müşahidə olunmur.