Bakı klinikalarının imtina etdiyi 70 yaşlı xəstə Tədris Cərrahiyyə Klinikasında sağaldı

19 May 2026

160

Bakı klinikalarının imtina etdiyi 70 yaşlı xəstə Tədris Cərrahiyyə Klinikasında sağaldı

Tədris Cərrahiyyə Klinikasında akademik İmamverdiyev, professor Rauf Nağıyev, urologiya kafedrasının rezidentləri və əsas anestezioloq Məmməd doktorun iştirakı ilə yüksək riskli xəstə üzərində mürəkkəb radikal sistektomiya əməliyyatı uğurla icra olunub.

Azmedinfo.az xəbər verir ki, 70 yaşlı kişi xəstə iki aydan artıq müddətdə davam edən hematuriya — sidikdə qan olması şikayəti ilə müxtəlif tibb müəssisələrinə müraciət edib. Aparılan müayinələr zamanı xəstədə sidik kisəsinin böyük həcmli invaziv törəməsi aşkarlanıb. Bununla yanaşı, xəstədə III mərhələ xroniki ürək çatışmazlığı və ürəyin atım fraksiyasının cəmi 20% olması əməliyyat riskini son dərəcə artırırdı.

Məhz bu səbəbdən xəstə Bakıda yerləşən bir sıra böyük klinikalarda müayinə olunsa da, əməliyyatın yüksək riskli olması nəzərə alınaraq cərrahi müdaxilə məqsədəuyğun hesab edilməyib.

Tədris Cərrahiyyə Klinikasında xəstə yenidən geniş şəkildə qiymətləndirilib və multidissiplinar yanaşma əsasında əməliyyata qərar verilib. Risklər xəstəyə və yaxınlarına ətraflı izah edildikdən sonra radikal sistektomiya əməliyyatı icra olunub.

Ağır ürək çatışmazlığı fonunda anestezioloji idarəetmə əməliyyatın ən kritik mərhələlərindən biri hesab olunurdu və bu baxımdan anestezioloq komandasının rolu xüsusi əhəmiyyət daşıyıb.

Hazırda əməliyyatdan bir ay keçib, xəstənin ümumi vəziyyəti qənaətbəxşdir, ciddi şikayəti yoxdur və bərpa prosesi uğurla davam edir.