Helicobacter Pylori (H.Pylori) mədənin turş mühitinə dözümlü olan və selikli qişanı zədələyərək xroniki iltihab yaradan yeganə bakteriyadır.

Azmedinfo.az xəbər verir ki, təcrübəli mütəxəssis, qastroenteroloq, hepatoloq və invaziv endoskopist Dr. Aqil Ağakişiyevin sözlərinə görə, əgər bu bakteriya aşkar olunubsa və müəyyən kliniki hallar müşahidə edilibsə, müalicə qətiyyən gecikdirilməməlidir.

Bu hallardan birincisi mədə və onikibarmaq bağırsaq xorasıdır ki, burada xoranın tam sağalması və yenidən residiv verməməsi üçün bakteriyanın kökü mütləq kəsilməlidir.

Digər mühüm məqam xərçəngdən öncəki mərhələ hesab olunan atrofik qastrit və intestinal metaplaziya vəziyyətləridir, çünki H. Pylori bu bədxassəli prosesi sadəcə sürətləndirir.

Eyni zamanda, genetik meylliliyi olan, yəni ailə anamnezində və yaxın qohumlarında mədə xərçəngi qeydə alınan şəxslər də mütləq eradikasiya müalicəsi almalıdırlar.

Bakteriyanın varlığı mədədə rast gəlinən nadir şiş növü olan MALT-limfomaya da yol açır ki, bu patologiya çox vaxt sadəcə bakteriyanın məhvi ilə geriləyə bilir.

Nəhayət, oynaq ağrıları və ya kardioloji səbəblərdən uzunmüddətli QSİƏP (qeyri-steroid iltihab əleyhinə preparatlar) və ya aspirin istifadə edən xəstələrdə bu dərmanlar H. Pylori ilə birləşdikdə mədə qanaması riskini dəfələrlə artırır.

 

Son illərdə H. Pylori-nin antibiotiklərə qarşı müqaviməti kəskin artdığı üçün "qonşum bu dərmanı içdi, sağaldı" məntiqi ilə kortəbii müalicə yolverilməzdir. Müalicə üsulu yalnız qastroenteroloq tərəfindən fərdi şəkildə, xəstənin xüsusi anamnezinə uyğun olaraq təyin edilməlidir.