D vitamini prediabeti (şəkərönü vəziyyəti) olan bəzi insanlarda tip 2 diabetin qarşısını ala bilər. Lakin aparılan son araşdırmalar göstərir ki, bu fayda tamamilə bədənimizin genetik quruluşundan asılıdır.

Azmedinfo.az xəbər verir ki, həkim-endokrinoloq Fərhad Burzu mövzu ilə bağlı mühüm məqamlara aydınlıq gətirib. Ekspert bildirib ki, D vitamininin bədəndə effektiv işləməsi üçün xüsusi qəbuledicilərə (reseptorlara) ehtiyacı var: "İnsanların genetikası fərqli olduğu üçün bu qəbuledicilər də fərqli funksiya yerinə yetirir. Nəticədə D vitamini bəzi insanlara yüksək səviyyədə kömək etdiyi halda, bəzilərində heç bir təsir göstərmir".

Məlumata görə, genişmiqyaslı bir araşdırmada prediabet diaqnozu qoyulmuş 2000-dən çox insanın tibbi göstəriciləri analiz edilib. İki qrupa bölünən könüllülərin hər biri gündəlik yüksək dozada (4000 IU) D3 vitamini qəbul edib.

Təxminən 2.5 il davam edən analizlərin nəticəsi isə olduqca təəccüblü olub. CC və ya AC genotipinə sahib olan şəxslərdə D vitamini qəbulu şəkər xəstəliyi riskini 19% azaldıb. AA genotipinə sahib olanlarda isə bu vitamin demək olar ki, heç bir müsbət təsir göstərməyib.

Endokrinoloq vurğulayıb ki, tip 2 diabet çox mürəkkəb xəstəlikdir və bədəndə onunla bağlı 500-dən çox genetik faktor mövcuddur. D vitamini bu böyük və mürəkkəb sistemin sadəcə kiçik bir hissəsidir, ona görə də onun effekti hər insanda eyni olmur.

Gələcəkdə genetik testlərin inkişafı sayəsində hər bir xəstə üçün fərdi, daha dəqiq və uyğun müalicə metodunun seçilməsi mümkün olacaq.