Qaraciyəri hədəf alan A, B, C, D və E virusları yoluxma yollarına görə fərqlənsə də, hamısı eyni orqana təsir edərək ciddi sağlamlıq riski yaradır və müxtəlif dərəcəli qaraciyər zədələnməsinə səbəb olur.

Azmedinfo.az xəbər verir ki, qastroenteroloq, hepatoloq və invaziv endoskopist Dr. Aqil Ağakişiyevin sözlərinə görə, bu virusların yaratdığı əsas təhlükə onların qaraciyər hüceyrələrini tədricən zədələməsi, orqanın detoksikasiya və metabolik funksiyalarını pozması və uzunmüddətli iltihabi proseslərin yaranmasına şərait yaratmasıdır. Xüsusilə B və C hepatit virusları xronik gedişə meylli olduğuna görə illər ərzində qaraciyərdə fibrozun inkişafına, daha sonra isə sirroz və hepatoselüler karsinoma kimi geri dönməz və həyati təhlükə yaradan ağır fəsadlara səbəb ola bilir.

Mütəxəssis vurğulayır ki, erkən diaqnostika, müntəzəm skrininq və vaxtında başlanılan antiviral müalicə bu ağırlaşmaların qarşısının alınmasında həlledici rol oynayır. Risk qrupuna daxil olan şəxslərin isə mütəmadi tibbi nəzarətdə saxlanılması vacib hesab olunur.