Mədənin daxili selikli qişasının uzunmüddətli iltihab nəticəsində nazilməsi və normal vəzilərin tədricən məhv olması ilə xarakterizə olunan atrofik qastrit, həzm sisteminin ən ciddi patologiyalarından biri hesab olunur.

Azmedinfo.az xəbər verir ki, mövzu ilə bağlı açıqlama verən qastroenteroloq, hepatoloq və invaziv endoskopist Dr. Aqil Ağakişiyev bildirib ki, bu xəstəlik zamanı mədə turşusu və həzm prosesi üçün həyati əhəmiyyət kəsb edən maddələrin ifrazında kəskin azalma müşahidə edilir.

Mütəxəssis qeyd edib ki, atrofik qastritin formalaşmasında əsas təkanverici amillər kimi Helicobacter pylori infeksiyası, orqanizmdə gedən autoimmun proseslər, xroniki xarakter almış qastrit, eləcə də siqaret və alkoqol kimi zərərli vərdişlər çıxış edir. Pasiyentlərin diqqətli olmalı olduğu əsas kliniki əlamətlər sırasına mədədə mütəmadi ağırlıq və yanma hissi, güclü şişkinlik, yemək zamanı normadan daha tez doyma, xroniki ürəkbulanma, həmçinin xəstəliyin gizli fəsadı olaraq meydana çıxan B12 vitamini çatışmazlığı və qanazlığı daxildir.

Xəstəliyin daha təhlükəli mərhələsi olan İntestinal Metaplaziya məsələsinə toxunan ekspert vurğulayıb ki, bu patologiya adətən atrofik qastritin proqresivləşən davamı kimi meydana gəlir və bu prosesdə normal mədə hüceyrələri öz funksiyasını itirərək bağırsaq tipli hüceyrələrlə əvəzlənir. 

Həkim bu diaqnozun tibb dünyasında xərçəngdən öncəki bir mərhələ qəbul edildiyini, lakin bunun mütləq şəkildə onkoloji xəstəliyə çevriləcəyi mənasına gəlmədiyini diqqətə çatdırıb. Həkimin sözlərinə görə, burada söhbət yalnız xərçəng ehtimalının yüksəlməsindən gedir və İntestinal Metaplaziya diaqnozu olduqca ciddi qəbul edilərək mütəmadi nəzarətdə saxlanılmalıdır. 

Ekspert sonda onu da əlavə edib ki, patologiya erkən mərhələdə aşkarlanıb doğru müalicə taktikası ilə idarə olunarsa, xərçəng riski minimuma enir və bu səbəbdən vaxtında edilən endoskopik müayinələr pasiyentlər üçün həyat xilas edici rol oynayır.