Atalar və qızlar - Həyata yazılan qürur dastanı

27 Fevral 2025

1684

Atalar və qızlar - Həyata yazılan qürur dastanı

Rubrikamızın növbəti qəhrəmanları Cəbrayıl Rayon Mərkəzi Xəstəxanasında uzun illərdir ki, həkim-cərrah vəzifəsində çalışan Məhəbbət Səmədov və onun qızı Naridə Səmədovadır. M.Səmədovun həyat yoldaşı Afilə xanım da uzun illər mərkəzi xəstəxanada tibb bacısı kimi çalışıb:

Azmedinfo.az həkim ailəsinin həyat hekayəsini təqdim edir:

“Beş övladım var, onlardan üçü qızdır. Qızlarımdan üçü də ali təhsillidir. Onların hər biri mənim kimi təhsilini bitirdikdən sonra öz rayonlarına qayıtdı və burada işə başladılar. Qızlarımdan biri məktəbdə müəllim, biri Respublika Təcili və Təxirəsalınmaz Tibbi Yardım Mərkəzinin Cəbrayıl rayon bölməsində həkim, sonuncu qızım Aysel isə Cəbrayıl Rayon Mərkəzi Xəstəxanasında mama vəzifəsində çalışır.

Mən hər üç qızımla qürur duyur, fəxr edirəm. Onların hər birinin öz işlərində peşəkar olması, ən əsası rayonumuz üçün yorulmadan çalışması məni qürurlandırır”.

Naridə Səmədova həkim olmağında əsas səbəbinin valideynləri olduğunu bildirir:

“Ailəmizdə atam həkim, anam isə tibb bacısı olub. Atamın işi ağır olsa da, hər gün bizimlə maraqlanır və təhsilimizə xüsusi diqqət yetirirdi. Bəzi ailələrdə olduğu kimi, valideynlərimiz heç vaxt qardaşlarımızı bizdən üstün tutmayıb, hər birimizə eyni qayğını göstərib. Mənim həkim olmaqda əsas səbəbim atamın I Qarabağ müharibəsi zamanı hərbi hospitalda həkim-ümumi cərrah kimi çalışıb hərbiçilərimizə yardım göstərməsi və yorulmadan bu işi davam etdirməsi oldu. O dövrdən artıq qarşıma məqsəd qoymuşdum ki, mən də onun kimi həkim olacam və şükürlər olsun ki, bu gün onun yolunu davam etdirirəm.

Bütün valideynlərə səslənirəm ki, qızlarınızı qoruyun və onlara təhsil almaqlarında dəstək olun”.

Qeyd edək ki, “Atalar və qızlar” rubrikasının məqsədi qız uşaqlarına qarşı ayrı seçkiliyin aradan qaldırılmasına, onlara olan münasibətin birmənalı olaraq dəyişməsinə və onlar üçün sağlam mühitin formalaşmasına təsir etməkdir.

“Atalar və qızlar” rubrikasının qəhrəmanları selektiv abortların qurbanına çevrilməyən, əksinə bu həyata gəlib, uğurla mübarizə aparan və bu mübarizədən qalib çıxan qız övladlarıdır.

Təəssüf ki, son illər Azərbaycanda müşahidə olunan demoqrafik proseslərin təhlili doğulan uşaqlar arasında oğlanların üstünlük təşkil etməsini göstərir. Təbii cinsi tarazlığın pozulması isə cəmiyyət, qadının sağlamlığı və gələcək üçün ciddi təhdiddir!

Gəlin elə yaşayaq ki, heç bir uşaq cinsi ayrı-seçkiliyə məruz qalmasın!

Bir gün onlar sizin fəxriniz ola bilər!

Selektiv abortlara "YOX" deyək!