ABŞ hökumətinin Sığorta Xidmətlərinin direktoru təyin olunmuş Mehmet Özünün bir müddət öncə verdiyi bəyanata əsasən, GLP-1 analoqu (arıqlama iynələri) preparatlarının aylıq qiyməti vətəndaşlara 50 dollara təklif olunacaqdır. Yeri gəlmişkən, Azərbaycanda bu rəqəm 130 dollardır.

Azmedinfo.az xəbər verir ki, məsələyə bir mütəxəssis kimi həssaslıqla yanaşan həkim-endokrinoloq Fərhad Burzu qeyd edir ki, ölkədə 110-120 milyon insanın artıq çəkili olduğunu nəzərə alsaq, dövlət tərəfindən görülən bu tədbir əvəzolunmazdır. Bu insanların müalicə olunmadıqları təqdirdə, qısa müddətdə ürək-qan damar, diabet və onkoloji kimi ağır xəstəliklərə düçar olacağı hər kəsə məlumdur. Piylənmənin səbəb olduğu bu ağırlaşmaların üzərinə əlillik riskini də gəlsək, problemin nə qədər ciddi və əhəmiyyətli olduğu aydın şəkildə bəlli olur.

Həkim qeyd edib ki, ölkəmizdəki vəziyyəti araşdırarkən isə Dövlət Statistika Komitəsinin (DSK) verdiyi məlumata əsasən, 2025-ci ildə Azərbaycanda rəsmi olaraq 814 000 artıq çəkili insanın olduğu məlum olur. Bu rəqəmin Ümumdünya Səhiyyə Təşkilatının orta statistikasından xeyli az olması ölkədəki tibbi statistikanın yetərsizliyindən xəbər verir və real rəqəmin ölkəmizdə qeyd olunandan ən azı 2 dəfə çox olduğu hesab edilir. Təəssüf ki, hazırda ölkəmizdə ambulator tibbi xidmət çərçivəsində insanlara artıq çəki ilə bağlı hər hangi bir xidmət göstərilmir, poliklinikalarda və dövlət xəstəxanalarında piylənmənin müalicəsi üçün heç bir tədbir nəzərdə tutulmur. Mövcud endokrinoloqlar tam gücləri ilə işləsələr də, onların imkanları yalnız diabetli xəstələrə xidmət göstərməyə yetirir.

"Ölkəmizdə ambulator tibbi xidmət göstərən qurumlar və onların rəhbərləri anlamalıdırlar ki, çəkisi azaldılmayan insanlar qısa müddətdə ürək-qan damar sisteminin pozulması, diabet və onkoloji xəstəliklərlə üzləşirlər. İnsanları bu ağırlaşmalardan qorumaq üçün çəkilərini azaltmaq və ümumiyyətlə, piylənmə əleyhinə effektiv tədbirlər planı həyata keçirmək aidiyyatı qurumlar üçün hazırkı dövrdə çox vacib bir vəzifədir. Bu tədbirlər planına həm dərman təminatı, həm mədə balonları, həm də ehtiyac yaranarsa, bariatrik cərrahiyyə əməliyyatları daxil edilməlidir. Unutmaq olmaz ki, vaxtında azaldılmayan çəki eyni zamanda gələcəkdə əlillik dərəcələrinin artması ilə dövlət büdcəsinə də əlavə yük olacaqdır", - deyə ekspert vurğulayıb.

Sonda əlavə edib ki, bütün bunlara görə, ölkədə ya piylənmə ilə bağlı xüsusi Dövlət Proqramı tərtib olunmalı, ya da ki aidiyyatı qurum (TƏBİB) poliklinika və dövlət xəstəxanalarında piylənmə (obezitə) müalicə otaqları ayıraraq vətəndaşlara müvafiq xidmətin göstərilməsini təşkil etməlidir.

Yemək blogerlərinin gecə-gündüz sosial şəbəkələrdə yeyib-içməyi təbliğ edərək insanları obezitəyə yönəltməsi barəsində də yazacaqdım, amma yazmadım. Nənələr demişkən, hamısını indi yazsam, sabaha nağıl qalmaz.