Yay mövsümündə havanın temperaturunun kəskin yüksəlməsi həzm sisteminin fəaliyyətinə birbaşa təsir göstərir və müxtəlif mədə-bağırsaq narahatlıqlarına zəmin yaradır.

Azmedinfo.az xəbər verir ki, mövzu ilə bağlı təcrübəli mütəxəssis, qastroenteroloq, hepatoloq, invaziv endoskopist Dr. Aqil Ağakişiyev yayda tez-tez qarşılaşılan həzm problemləri və onların qarşısının alınması yolları haqqında vacib məqamları diqqətə çatdırır.

İsti havalarda orqanizm tərləmə vasitəsilə daha çox maye itirir. Kifayət qədər su qəbul edilmədikdə həzm sistemi yavaşlayır, bu da qəbizlik, köp və mədədə ciddi narahatlıqların yaranmasına səbəb olur.

Mövsümlə əlaqədar olaraq qidalanma vərdişləri də köklü şəkildə dəyişir. Yağlı yeməklər, fast-food, qazlı içkilər və soyuq desertlərin normadan artıq qəbul edilməsi həzm sistemini həddindən artıq yükləyir.

Diqqət yetirilməli digər mühüm məqam isə qidaların saxlanma şəraitidir. İsti havada ərzaqlar daha tez xarab olur. Düzgün temperaturda saxlanılmayan qidaların qəbulu ağır qida zəhərlənmələrinə və kəskin bağırsaq infeksiyalarına yol aça bilər.

Yay aylarında həzm problemlərinin qarşısını almaq üçün aşağıdakı profilaktik qaydalara əməl etmək vacibdir:

Gün ərzində su balansını qoruyun və bol su içməyə özen göstərin.

Yüngül, həzmi rahat və təzə hazırlanmış qidalara üstünlük verin.

Mövsümi meyvə və tərəvəzləri istifadə etməzdən əvvəl tam gigiyenik qaydada, yaxşıca yuyun.

Mütəxəssis xüsusilə xəbərdar edir ki, əgər qarın ağrısı, köp, ürəkbulanma, ishal və ya qəbizlik uzun müddət davam edərsə, bu simptomları yalnız isti hava ilə əlaqələndirib vaxt itirmək olmaz. Dəqiq səbəbin müəyyənləşdirilməsi və vaxtında düzgün müalicə olunması üçün mütləq qastroenteroloqa müraciət etmək vacibdir.