Diaqnoz eynidirsə, müalicə də eyni olmalıdırmı? Bu suala bu gün artıq birmənalı cavab vermək mümkün deyil. Çünki iki pasiyentdə eyni diaqnoz qoyulsa belə, xəstəliyin səbəbi, gedişatı və orqanizmə təsiri tamamilə fərqli ola bilər. Məhz buna görə müasir kardiologiya getdikcə daha çox fərdiləşdirilmiş yanaşmaya üstünlük verir.

Azmedinfo.az xəbər verir ki, bu fikirləri Səhiyyə Nazirliyi Elmi-Tədqiqat Kardiologiya İnstitutunun direktoru, professor Gülnaz Dadaşova bildirib. Həkimin sözlərinə görə, Parisdə keçirilən Heart Failure 2026 konqresində də əsas vurğulanan məqamlardan biri məhz hər xəstəyə fərdi yanaşmanın vacibliyi olub. Bu, standart müalicədən imtina etmək anlamına gəlmir. Əksinə, elmi sübutlara əsaslanan müalicənin hər bir pasiyentin yaşı, arterial təzyiqi, nəbzi, ürək ritmi, ürək və böyrəklərinin vəziyyəti, hətta zəruri hallarda genetik xüsusiyyətləri nəzərə alınaraq tətbiq olunması deməkdir.

"Çünki düzgün müalicə yalnız doğru dərmanı seçməkdən ibarət deyil. Əsas məsələ düzgün zamanda, düzgün xəstə üçün, düzgün strategiyanı müəyyənləşdirməkdir. Genetika, süni intellekt, yeni dərmanlar və müasir texnologiyalar artıq fərdiləşdirilmiş kardiologiyanın ayrılmaz hissəsinə çevrilib", - deyə professor vurğulayıb.

Kardiologiya sürətlə dəyişir. Biz də bu yenilikləri izləyir, öyrənir, dəyərləndirir və praktikada tətbiq edirik.