Son illərdə ən çox rast gəlinən suallardan biri insulin dirənci diaqnozu qoyulan şəxslərin dərhal metformin qəbuluna başlamasının doğru olub-olmamasıdır.

Azmedinfo.az xəbər verir ki, Bakı Sağlamlıq Mərkəzinin Endokrinologiya şöbəsinin müdiri, həkim-endokrinoloq, tibb üzrə fəlsəfə doktoru Oqtay Hüseynovun sözlərinə görə, HOMA-IR göstəricisi 2.7-dən yuxarı çıxdıqda dərhal dərmana başlamaq hər zaman doğru və vacib yanaşma hesab olunmur.

Ekspert bildirir ki, burada ən mühüm məqam insulin müqavimətinin müstəqil bir xəstəlik deyil, orqanizmdə maddələr mübadiləsinin mövcud vəziyyətini əks etdirən bir göstərici olduğunu anlamaqdır.

Əgər pasiyentdə:

acqarına qan şəkəri normal həddədirsə,

qlikozilləşmiş hemoqlobin (HbA1c) göstəricisi normadadırsa,

diabet və ya prediabet diaqnozu təsdiqlənməyibsə,

yalnız yüksək HOMA-IR nəticəsinə əsaslanaraq metformin təyin etmək düzgün deyil.

Bəzən insulin səviyyəsinin 15–20 aralığında olması pasiyentlərdə mütləq dərman müalicəsi tələbatı illüziyası yaradır. Lakin qanda insulin səviyyəsi son dərəcə dəyişkəndirsə, çəki, günlük qidalanma, fiziki aktivlik, stress dərəcəsi və hətta laboratoriyanın analizişləmə metodikası bu göstəriciyə birbaşa təsir edir.

Müasir beynəlxalq tibbi protokollara və tövsiyələrə əsasən, metformin prediabet mərhələsində olan və xüsusilə yüksək risk qrupuna daxil edilən şəxslərdə nəzərdən keçirilir.

İnsulin müqavimətinin bərpasında əsas və en effektiv müalicə üsulları aşağıdakılardır:

artıq bədən çəkisinin azaldılması,

müntəzəm fiziki aktivliyin təmin olunması,

balanslaşdırılmış düzgün qidalanma,

kifayət qədər və keyfiyyətli yuxu rejimi.

Tibbi faktlar göstərir ki, bədən çəkisinin cəmi 5–10% azalması belə dokular səviyyəsində insulin həssaslığını əhəmiyyətli dərəcədə yaxşılaşdırmağa qadirdir.

Metformin effektiv və faydalı preparat olsa da, hər yüksək HOMA-IR göstəricisi metformin resepti yazılması üçün əsas deyil. Müalicə strategiyasında təcrid olunmuş analiz cavabına dəyil, pasiyentin ümumi kliniki vəziyyətinə kompleks baxılmalıdır.